Մենք արդեն աշխատում ենք Ղազախստանի և Վրաստանի հետ Միջին միջանցքի զարգացման համար և ցանկանում ենք գրավել մեր չինացի ընկերներին,- այս մասին չինական լրատվամիջոցներին տված հարցազրույցում ասել է Ադրբեջանի նախագահի արտաքին հարցերով խորհրդական Հիքմեթ Գաջիևը։

Ադրբեջանի նախագահի խորհրդականի խոսքով, նման նախագծում, որը հատում է տարբեր երկրների տարածքները, «մեկ պատուհանի» հնարավորությունը վճռորոշ է հատկապես չինական ընկերությունների համար, ովքեր ցանկանում են իրենց բեռնափոխադրումները վերահղել դեպի եվրոպական շուկա։

Գաջիևը նշել է, որ կարևոր է նաև մաքսային կանոնների պարզեցումն ու ստանդարտացումը։

«Մենք հաշվի ենք առել նաև Չինաստանի և Ղազախստանի միջև վերջերս ձեռք բերված համաձայնագիրը Միջին միջանցքի վերաբերյալ։ Մենք նույնպես մտածում ենք նման համաձայնագրի ստորագրման մասին։ Միգուցե մենք կարողանանք այս ոլորտում եռակողմ համաձայնագիր կնքել Ադրբեջանի, Ղազախստանի և Չինաստանի միջև։ Մենք անհամբեր սպասում ենք Չինաստան+Կենտրոնական Ասիա և Չինաստան+Կենտրոնական Ասիա+Ադրբեջան հայեցակարգերի զարգացմանը»,- ասել է Հիքմեթ Գաջիևը։

Միջին միջանցքը միացնում է Չինաստանի և ԵՄ-ի բեռնարկղային երկաթուղային բեռնափոխադրումների ցանցերը Կենտրոնական Ասիայի, Հարավային Կովկասի, Թուրքիայի և Արևելյան Եվրոպայի միջոցով: Բազմակողմանի մուլտիմոդալ տրանսպորտային ենթակառուցվածքը կապում է Կասպից և Սև ծովի լաստանավային տերմինալները Չինաստանի, Ղազախստանի, Ադրբեջանի, Վրաստանի, Թուրքիայի, Ուկրաինայի և Լեհաստանի երկաթուղային համակարգերի հետ: