Ադրբեջանական կողմը կապահովի ղարաբաղցի հայերի քաղաքական, քաղաքային, տնտեսական, սոցիալական և հումանիտար իրավունքները և, համապատասխանաբար, կրոնական իրավունքները,- ասել է Ադրբեջանի նախագահի արտաքին քաղաքականության հարցերով խորհրդական Հիքմեթ Հաջիևը։

Ադրբեջանի կառավարության ներկայացուցչի խոսքով, վերաինտեգրման մասին խոսելիս Ադրբեջանը նկատի ունի բոլոր տարրերը, այդ թվում՝ ղարաբաղցի հայերի սոցիալ-տնտեսական վերաինտեգրումն Ադրբեջանում։

Ըստ Հիքմեթ Հաջիևի՝ Ադրբեջանի իշխանությունը հումանիտար բեռներ, նավթ, գազ, բենզին կմատակարարի և բժշկական օգնություն կտրամադրի Ղարաբաղում բնակվող հայերին։

«Մենք պաշտոնապես՝ նախագահի մակարդակով, կապահովենք ղարաբաղցի հայերի իրավունքներն ու անվտանգությունը՝ Ադրբեջանի Հանրապետության Սահմանադրությանը համապատասխան։ Դա նշանակում է, որ մենք նրանց վերաբերվում ենք որպես հավասար քաղաքացիների։ Սա վերաբերում է նաև բոլոր քաղաքացիական անձանց։ Քաղաքացիների, նույնիսկ նախկին զինծառայողների և մարտիկների համար խնդիրներ չպետք է լինեն, եթե դրանք կարելի է դասել որպես այդպիսին։ Համաներում ենք նախատեսում: Մենք պայմանավորվեցինք, որ նրանք, ովքեր վայր կդնեն զենքերը և կխոստանան ուժ չկիրառել ադրբեջանական ուժերի դեմ, պարզապես կազատվեն պատասխանատվությունից։ Նրանք պետք է որոշեն՝ մնալու են Ղարաբաղում, թե գնալու են Հայաստան։ Սա նրանց որոշումն է»,- ասել է Հիքմեթ Հաջիևը։