Վրաստանի վարչապետ Իրակլի Կոբախիձեն հանդիպել է Ադրբեջանի նախագահ Իլհամ Ալիևի հետ։ Այս մասին տեղեկություն է տարածում Ալիեւի վարչակազմը։

Նրանց տվյալներով՝ Ալիեւը շնորհավորել է Կոբախիձեին խորհրդարանական ընտրություններում «Վրացական երազանք-Ժողովրդավարական Վրաստան» կուսակցության հաղթանակի կապակցությամբ եւ հաջողություն մաղթել հետագա գործունեության մեջ։

Ինչպես նշվում է Ադրբեջանի նախագահի վարչակազմի տեղեկատվության մեջ, Ալիևը նաև ընդգծել է, որ ընտրությունների արդյունքներն արտացոլում են վրաց ժողովրդի կամքը։

«Իրակլի Կոբախիձեն շնորհակալություն է հայտնել Ալիևին՝ իրեն շնորհավորելու համար։

Հանդիպմանն ընդգծվել են երկու երկրների միջև ամուր բարեկամական հարաբերությունները և համագործակցությունը քաղաքական, տնտեսական և տրանսպորտային ոլորտներում։

Ալիևը Կոբախիձեին հրավիրել է Ադրբեջան պաշտոնական այցի, իսկ ի պատասխան Կոբախիձեն Ալիևին հրավիրել է Թբիլիսի։ Ղեկավարները միմյանց շնորհակալություն են հայտնել և ընդունել միմյանց հրավերները»,- ասված է տեղեկատվության մեջ։