Ադրբեջանի Հանրապետության նախագահ Իլհամ Ալիևը և նրա կինը այսօր պետական ​​այցով կժամանեն Վրաստան: Այս մասին հայտնում է Վրաստանի կառավարության մամուլի ծառայությունը։

Նրանց փոխանցմամբ՝ պետական ​​այցի շրջանակներում Ադրբեջանի Հանրապետության նախագահը կհանդիպի Վրաստանի նախագահ Միխեիլ Ղավելաշվիլիի և վարչապետ Իրակլի Կոբախիձեի հետ։

Վրաստանի նախագահական պալատում կկայանա Ադրբեջանի Հանրապետության նախագահի պաշտոնական դիմավորման արարողությունը, որից հետո նախատեսվում է Միխեիլ Ղավելաշվիլիի և Իլհամ Ալիևի միջև անձնական հանդիպում։

Ադրբեջանի Հանրապետության նախագահին կառավարության աշխատակազմում կընդունի Վրաստանի վարչապետը: Իրակլի Կոբախիձեն և Իլհամ Ալիևը կհանդիպեն ինչպես անձնական, այնպես էլ ընդլայնված կազմով, որից հետո առաջնորդները համատեղ հայտարարություններ կանեն լրատվամիջոցների համար։

Վրաստան պետական ​​այցի շրջանակներում Ադրբեջանի Հանրապետության նախագահը ծաղկեպսակ կդնի Հերոսների հրապարակում գտնվող Հերոսների հուշարձանին և հարգանքի տուրք կմատուցի Ադրբեջանի ազգային առաջնորդ Հեյդար Ալիևի հիշատակին։

Ադրբեջանի Հանրապետության նախագահը Վրաստան կայցելի պատվիրակության հետ միասին, որի կազմում են Ադրբեջանի արտաքին գործերի նախարար Ջեյհուն Բայրամովը, նախագահի արտաքին քաղաքականության հարցերով օգնական Հիքմեթ Հաջիևը, էկոնոմիկայի նախարար Միխայիլ Ջաբարովը, էներգետիկայի նախարար Փարվիզ Շահբազովը և թվային զարգացման և տրանսպորտի նախարար Ռաշադ Նաբիևը։