Ադրբեջանի արտաքին գործերի նախարարություն - Հեռախոսազրույցի ընթացքում Ջեյհուն Բայրամովը դատապարտել է Իրանի կողմից Նախիջևանի տարածքում իրականացված անօդաչու թռչող սարքերի հարձակումները, մինչդեռ Աբբաս Արաղչին հայտարարել է, որ միջադեպի հետաքննություն է սկսվել
Իրանի և Ադրբեջանի արտաքին գործերի նախարարների միջև հեռախոսազրույց է տեղի ունեցել։ Այս մասին ասվում է Ադրբեջանի արտաքին գործերի նախարարության տարածած հայտարարության մեջ։
«Հեռախոսազրույցի ընթացքում նախարար Ջեյհուն Բայրամովը խստորեն դատապարտել է Իրանի Իսլամական Հանրապետության կողմից Ադրբեջանի Հանրապետության Նախիջևանի Ինքնավար Հանրապետության տարածքում իրականացված անօդաչու թռչող սարքերի հարձակումները և հստակ բողոք է հայտնել այս կապակցությամբ։ Նա ընդգծել է, որ Ադրբեջանի տարածքում այդ հարձակումները հակասում են միջազգային իրավունքի նորմերին և սկզբունքներին և ծառայում են տարածաշրջանում լարվածության մեծացմանը», – ասվում է նախարարության հայտարարության մեջ։
Ըստ նրանց՝ Աբբաս Արաղչին մտահոգություն է հայտնել Նախիջևանի տարածքում անօդաչու թռչող սարքերի հարձակման վերաբերյալ և հայտարարել, որ իրանական կողմը և զինվորականները հետաքննություն են սկսել միջադեպի վերաբերյալ։
