Ֆրանսիան, շարունակելով նեոգաղութատիրական քաղաքականությունը, ներկայանում է որպես «մարդու իրավունքների պաշտպան»,- այս մասին նշվում է Ադրբեջանի ԱԳՆ հայտարարության մեջ։

Ադրբեջանի արտաքին գործերի նախարարության տեղեկատվության համաձայն՝ «Ֆրանսիան, որպես այն երկրներից մեկը, որը դեռ շարունակում է նեոգաղութատիրությունը և իր գաղութային քաղաքականության շրջանակներում ուշադրություն չի դարձնում մարդու իրավունքներին, այսօր կեղծավոր կերպով ներկայանում է որպես մարդու իրավունքների և միջազգային իրավունքի պաշտպան»:

Ըստ Ադրբեջանի արտաքին գործերի նախարարության, Ֆրանսիան, որը շարունակում է անհիմն պահանջներ ներկայացնել իր նեոգաղութատիրական նկրտումներով, դատապարտված է ձախողման։

«Այսօր Ֆրանսիան իր գաղութային անցյալի, արյունալի գաղութային հանցագործությունների, ցեղասպանության ակտերի և պատմությունից դասեր քաղելու փոխարեն, աջակցում է հայկական անջատողականությանը Ադրբեջանի Ղարաբաղի տարածաշրջանում, փորձում է աշխարհաքաղաքական մրցակցություն ստեղծել Հարավային Կովկասում և օգտագործում է գաղութատիրական գործելաոճը՝ հիմնված օրիենտալիզմի վրա, ինչը նույնքան վտանգավոր և անընդունելի է»,- ասվում է հայտարարության մեջ։