2022 թվականի հունվարին տասը խոշոր արտահանող երկրների մասնաբաժինը Վրաստանի ընդհանուր արտահանման մեջ կազմել է 82,3 տոկոս։ Վրաստանի արտաքին առևտրի վերաբերյալ նախնական տվյալները հրապարակում է Ազգային վիճակագրական ծառայությունը։

Ծառայության նախնական տվյալներով՝ առաջին տեղը խոշորագույն արտահանող երկրների շարքում՝ 49,6 մլն. դոլարով  զբաղեցնում է Բուլղարիան, որին հաջորդում է Ադրբեջանը՝ 46,8 մլն. ԱՄՆ դոլարով, իսկ երրորդ տեղում՝ Ռուսաստանն է՝ 42,7 մլն. ԱՄՆ դոլարով։

Ինչ վերաբերում է ներմուծմանը, ապա, ըստ գործակալության, այս տարվա հունվարին Վրաստանի ներմուծման ընդհանուր ծավալում տասը խոշոր ներմուծող գործընկեր երկրների մասնաբաժինը կազմել է 69,2 տոկոս։ Լավագույն եռյակում է Թուրքիան՝ 141,1 մլն. ԱՄՆ դոլարով, Ռուսաստանը՝ 85,9 մլն. դոլարով և Ադրբեջանը՝ 75,2 մլն. ԱՄՆ դոլարով։

Միևնույն ժամանակ, ըստ վիճակագրության ծառայության հաշվետվության, 2022 թվականի հունվարին ապրանքային խմբերի արտահանման առաջին տասնյակում առաջին տեղն են զբաղեցրել պղնձի հանքաքարերը և խտանյութերը՝ 66,3 մլն. ԱՄՆ դոլարով, որը կազմում է ամբողջ արտահանման 20,0 տոկոսը: Երկրորդ տեղում են ավտոմեքենաները՝ 36,4 մլն. ԱՄՆ դոլարով, իսկ երրորդ տեղում ֆեռոհամաձուլվածքներն են՝ 31,4 մլն. ԱՄՆ դոլարով։ Իսկ ներմուծման ամենամեծ ապրանքախումբն այս տարվա հունվարին ներկայացվել է մարդատար ավտոմեքենաների տեսքով, որոնց ներմուծումը կազմել է 80,2 մլն. ԱՄՆ դոլար և կազմել է ընդհանուր ներմուծման 10,3 տոկոսը: Երկրորդ տեղը զբաղեցրել է նավթն ու նավթամթերքը՝ 72,7 մլն. Երրորդ տեղում նավթային գազերն ու այլ գազային ածխաջրածիններն են՝ 64,0 մլն. ԱՄՆ դոլարով։