Պավել Հերչինսկի. Ուկրաինան պայքարում է այն արժեքների համար, որոնց վրա հիմնված է Եվրոպան, Ուկրաինայի պայքարը մեր պայքարն է, Ուկրաինան պետք է հաղթի
Մեկ տարի է անցել այն օրվանից, երբ սկսվել է Ռուսաստանի անհիմն և չհրահրված ներխուժումը Ուկրաինա։ Շարունակվող պատերազմը միջազգային իրավունքի հիմնարար արժեքների և սկզբունքների աննախադեպ խախտում է: Ուկրաինան հարձակման ենթարկվեց, քանի որ նա ցանկանում էր ինքնուրույն որոշել իր ապագան, այլ ոչ թե Մոսկվայի հրահանգով,- ասել է Վրաստանում ԵՄ դեսպան Պավել Հերչինսկին տեսաուղերձում, որը տարածել է Վրաստանում ԵՄ ներկայացուցչությունը։
Դեսպանի խոսքով, ՄԱԿ-ի կանոնադրության համաձայն՝ Ուկրաինան, որպես ագրեսիայի զոհ, ունի ինքնապաշտպանության անձեռնմխելի իրավունք։
«Եվրամիությունը շարունակում է միասնաբար և հաստատակամորեն աջակցել Ուկրաինային բոլոր ճակատներում՝ հումանիտար, տնտեսական, քաղաքական, դիվանագիտական և ռազմական: Այդ ագրեսիան ուղղված է ոչ միայն ինքնիշխան երկրի՝ Ուկրաինայի, այլեւ ամբողջ աշխարհում ժողովրդավարության դեմ։ Սա սպառնալիք է բոլոր երկրների համար, քանի որ վտանգված է նրանց անկախությունը և սեփական որոշումների հիման վրա ընտրություն կատարելու իրավասությունը:
Եվրամիությունը փորձում է հասնել միջազգային հանրության կողմից Ռուսաստանի միջազգային դատապարտմանը և հնարավորինս մեկուսացմանը։ Մեր համախմբվածությունը միջազգային ասպարեզում համախոհ գործընկերների հետ անսասան է և մենք միասին ձեռնարկում ենք աննախադեպ գործողություններ։ Վրաստանն ակտիվորեն մասնակցում է այդ ջանքերին։
ՄԱԿ-ի Գլխավոր ասամբլեայի վեց բանաձեւերը հաստատում են Ռուսաստանի միջազգային դատապարտումն ու մեկուսացումը։
ԵՄ-ի աջակցությունն Ուկրաինային չի նվազեցնի նրա ուշադրությունը մյուս գործընկերների նկատմամբ։ Ընդհակառակը, Ուկրաինայում Ռուսաստանի պատերազմին պետք է միանշանակ և հաստատակամ պատասխան տալ, որպեսզի ագրեսորը պատասխանատվության ենթարկվի։
Վրաստանի սերտ համագործակցությունը Եվրամիության հետ՝ հիմնված ընդհանուր եվրոպական արժեքների ընդհանուր ըմբռնման վրա, ամուր հիմք է Եվրամիության և Վրաստանի միջև ավելի սերտ հարաբերություններ կառուցելու համար: Եվրամիությունը Վրաստանին տվել է հստակ եվրոպական հեռանկար, որը ներառում է Եվրամիության թեկնածուի կարգավիճակ ստանալու կոնկրետ քայլեր։ Այս գործընթացը հիմնված է արժանիքների վրա և ուղղված է բարեփոխումներին:
Միևնույն ժամանակ, Ռուսաստանը և ապատեղեկատվության այլ դերակատարները փորձում են շահարկել տեղեկատվական տարածքը՝ խոչընդոտելու ինտեգրմանը, պառակտում առաջացնելու և համերաշխությունը նվազեցնելու համար: Մենք պետք է զգոն մնանք, ուժեղացնենք մեր ճկունությունը և սերտորեն համագործակցենք այս չարամիտ գործողություններին դիմակայելու համար:
Ուկրաինան պայքարում է այն արժեքների համար, որոնց վրա հիմնված է Եվրոպան. Ուկրաինայի պայքարը մեր պայքարն է. Ուկրաինան պետք է հաղթի: Փա՛ռք Ուկրաինային»,- նշում է Պավել Հերչինսկին։
