Լևան Ժորժոլիանի․ «Կառավարությունը կարևոր քայլեր է ձեռնարկել թափանցիկության, հաշվետվողականության և արդյունավետ մոնիտորինգի ուղղությամբ, Արդյունավետության դեպարտամենտը բյուջեին ավելի քան 390 մլն լարիի խնայողություն է բերել»
Վրաստանի կառավարության աշխատակազմի ղեկավար Լևան Ժորժոլիանին ՄԱԿ-ի հանրային ծառայությունների ֆորումի շրջանակներում մասնակցել է «Պետական հաշվետվողականության ուժեղացում վերահսկողության միջոցով» թեմայով պանելային քննարկմանը։
Կառավարության աշխատակազմի ղեկավարն ուշադրություն է դարձրել հաշվետվողականության, թափանցիկության և արդյունավետ կառավարման ուղղությամբ Վրաստանի կառավարության կողմից ձեռնարկված քայլերին և նշել, որ այս սկզբունքները կարևոր են ոչ միայն լավ կառավարման համար, այլև անհրաժեշտ են հասարակության վստահության բարձրացման, ինստիտուտների անխափան գործունեության և քաղաքացիների համար շոշափելի արդյունքների հասնելու համար։
Լևան Ժորժոլիանին խոսել է նաև կառավարության աշխատակազմի՝ որպես համակարգող գերատեսչության դերի և Վրաստանի իշխանությունների կողմից իրականացված բարեփոխումների մասին, այդ թվում՝ «Պետական գնումների մասին» օրենքում կատարված փոփոխությունների, Կառավարության արդյունավետության դեպարտամենտի և Պետական աուդիտի ծառայության գործունեության մասին։
Ընդգծվել է մոնիտորինգի, թափանցիկության և անկախ վերահսկողության մեխանիզմների կարևոր դերը հանրային ինստիտուտների բարեխղճության և ծառայությունների որակի բարելավման գործընթացում։
«Վրաստանի կառավարությունը կարևոր քայլեր է ձեռնարկել թափանցիկության, հաշվետվողականության և արդյունավետ մոնիտորինգի ուղղությամբ։ Հատկապես կառանձնացնեի խորհրդարանում նախաձեռնված բարեփոխումները պետական գնումների ոլորտում, ինչը զգալիորեն բարելավում է իրավիճակը։ Նաև մոնիտորինգի մասով ստեղծվել է Կառավարության արդյունավետության դեպարտամենտը, որը 2025 թվականի 6 ամսում և 2026 թվականի այս ժամանակահատվածի դրությամբ ավելի քան 390 մլն լարիի խնայողություն է բերել բյուջեին։ Բացի այդ, մենք զգալիորեն ուժեղացրել ենք Պետական աուդիտի ծառայությունը։ Վերջին փոփոխություններով՝ դրան միացավ Հակակոռուպցիոն բյուրոն, և Հակակոռուպցիոն բյուրոն դարձավ սահմանադրական մարմնի մաս, ինչն ապահովում է նրա էլ ավելի մեծ անկախությունը»,– հայտարարել է Լևան Ժորժոլիանին։
ՄԱԿ-ի հանրային ծառայությունների ֆորումը կտևի 3 օր։ Ֆորումի մասնակիցները կքննարկեն այնպիսի հարցեր, ինչպիսիք են՝ թվային տրանսֆորմացիան, արհեստական բանականության պատասխանատու օգտագործումը, տվյալների պաշտպանությունը, ներառական կառավարումը, կոռուպցիայի դեմ պայքարը, քաղաքացիների ներգրավվածության ուժեղացումը և հանրային ծառայությունների հասանելիության բարելավումը։
Տեղեկատվությունը տարածում է Վրաստանի կառավարության աշխատակազմը։