«Իսլամական պետություն» (ԻՊ) ահաբեկչական խմբավորումը տարածել է հայտարարություն, որում ստանձնել է հոկտեմբերի 31-ին Նյու Յորքի Մանհեթեն թաղամասում կատարված և 8 մարդու մահվան պատճառ դարձած ահաբեկչական հարձակման պատասխանատվությունը, հաղորդում է Reuters-ը:

Այնուհանդերձ՝ խմբավորումն իր հայտարարության համար որևէ ապացույց չի ներկայացրել՝ նշելով միայն, որ «հարձակվողը «խալիֆայության» զինվորներից մեկն է»:

Մինչդեռ Միացյալ Նահանգների նախագահ Դոնալդ Թրամփը կրկնել է Նյու Յորքի ահաբեկչին՝ ուզբեկ ներգաղթյալ Սայֆուլո Սաիպովին, մահապատժի դատապարտելու վերաբերյալ կոչը: Նախագահն այդ մասին գրել է Twitter-ում:

Սակայն Նյու Յորքի քաղաքապետ Բիլ դե Բլազիոն նշել է, որ ինքը դեմ է մահապատժին:

«Կարծում եմ, որ այս մարդը պետք է մինչև կյանքի վերջ փտի բանտում»,-ասել է Դե Բլազիոն:

Հիշեցնենք, որ  Սայֆուլո Սաիպովը, որը հայտարարել էր «Իսլամական պետություն» ահաբեկչական խմբավորման անունից գործելու մասին, իրավապահ մարմինների ներկայացուցիչներին ասել է, որ ուրախ է իր արածի համար:

Ծնունդով Ուզբեկստանից 29-ամյա երիտասարդն այդ մասին ասել է հիվանդանոցում գտնվելու ժամանակ: Հայտնի է, որ ահաբեկչությունն իրագործելուց հետո Սաիպովը փենթբոլի համար նախատեսված ատրճանակով դուրս է եկել մեքենայից, ինչից հետո ոստիկաններին հաջողվել է կրակել նրա որովայնին ու վնասազերծել: Դրան հաջորդել է Սաիպովի հոսպիտալացումը:

Աղբյուրը հավելում է, որ Սաիպովը ոչ միայն չի զղջացել իրագործած սպանդի համար, այլև խնդրել է հիվանդասենյակում կախել ԻՊ-ի դրոշը:

Հայտնի է, որ նախքան ահաբեկչության իրագործումը, Սաիպովը ցանկացել է մեքենայի առաջից ու հետևից կախել ԻՊ-ի դրոշները, սակայն վերջին պահին տարակուսել է՝ մտածելով, որ դա շատ ուշադրություն կգրավի:

Հավելենք, որ Միացյալ Նահանգների իշխանություններն ահաբեկչության մեղադրանք են ներկայացրել Սաիպովին: Մեղադրանքները ներկայացվել են 2 հոդվածով՝ «Իսլամական պետություն» (ԻՊ) ահաբեկչական խմբավորմանը նյութական աջակցության և մարդկանց նկատմամբ բռնության իրագործման համար:

Նախքան ահաբեկչական հարձակումը, Սաիպովը տևական ժամանակ հեռախոսով դիտել է ԻՊ-ի գլխատումների ու մարդկանց նկատմամբ այլ դաժան բռնությունների վերաբերյալ 100-ից ավելի տեսանյութ, որոնց ազդեցության տակ գտնվելով էլ որոշել է նման մի բան ձեռնարկել:

Հիշեցնենք, որ հոկտեմբերի 31-ին 29-ամյա երիտասարդը վարձակալած մեքենայով դուրս էր եկել հեծանվորդների համար նախատեսված ճանապարհի վրա ու վրաերթի ենթարկել մարդկանց, այնուհետև նա բախվել էր դպրոցական ավտոբուսի: Ոստիկաններին հաջողվել էր վնասազերծել Սաիպովին ու ձերբակալել նրան: