Евроеидгыла Иреиҳау ахаҭарнак Жозеп Боррель Қырҭтәыла имҩаԥысыз алхрақәа рышьҭахь аҭыԥ змаз ахҭысқәа ирызкны аҳәамҭа ҟаиҵеит.

Жозеп Боррель иажәақәа рыла, Қырҭтәыла ацентртә алхратә комиссиеи иашьашәалоу аорганқәеи ауаажәларра рыгәрагара иаԥырхагоу аилагарақәеи,  алзыҩцәа рықәыӷәӷәареи, алхҩцәа рыршәареи хымԥада иҭырҵаароуп.

«Жьҭаара 26 рзы Қырҭтәыла имҩаԥысыз алхрақәа рышьҭахь аҭыԥ змаз ахҭысқәа даара угәы унархьуеит. Жәларбжьаратәи анаԥшцәа алхратә кампаниа анымҩаԥысуаз аамҭазы, иара убас алхрақәа рышьҭахьгьы аилагарақәа аҭыԥ шрымаз аарыцҳаит. Қырҭтәыла ацентртә алхратә комиссиеи иашьашәалоу аорганқәеи ауаажәларра рыгәрагара иаԥырхагоу аилагарақәеи,  алзыҩцәа рықәыӷәӷәареи, алхҩцәа рыршәареи хымԥада иҭырҵаароуп», – иҳәеит Боррель.

Жозеп Боррель ишазгәеиҭаз ала, Қырҭтәыла Евроеидгыла акандидат тәылоуп, убри аҟнытә алхратә процесс аартызаареи европатәи ахәынаӡарақәа гәык ала рызныҟәареи аанарԥшыроуп.