Амилаҭқәа рлига аҳәаақәа ирҭагӡаны Украинаҟны аматчнӡа, Қырҭтәыла аизга азыҟаҵаҩ хада Вилли Саниоль апрессконференциа мҩаҧиган, ақырҭуа аизга ахиазаара далацәажәеит.

„Ақәҿиарадоу асериа иаанагом еснагь ус инагӡахоит ҳәа. Украина аизга ҕәҕәоуп, уаҟа ибзиаӡоу ахәмарҩцәа ихәмаруеит, убри аҟынтә, ҳшьапылампыласҩцәа рылшарақәа зегьы ииашаны иаадырҧшыроуп. Ари аиҧылара шыуадаҩхо ҳдыруеит, аха, агәра ганы сыҟоуп украинаа рҧылара ҳшазыхиоу.

Ашьапылампыласҩцәа рус ишазныҟәо сгәаҧхоит. Ҧасеиҧш, излауа ала ибзианы рхы аадырҧшыр рҭахуп.  Ашьапылампыл аҿы уаҵахар ауеит, аха, улшарақәа зегьы аҵыхәанӡа иааурҧшыроуп, абри ауп ихадоу.

Аиаша шәасҳәап, уажәы агәыҧаҿ иарбан ҭыҧу иаанаҳкыло сазхәыцуам. Агәыҧ аҿы ҳаиндаҭлаҩцәа Европа ачемпионатахь ишиашо аквалификациала ииасит, ҳара  – плеи-офф аҟынтә. Уи алагьы иубарҭоуп Амилаҭқәа рлигаҿ ҳаиндаҭлаҩцәа шаҟа иҕәҕәоу.

Аха, цәыббразы имҩаҧаагаз ахәмаррақәа ишьақәдырҕәҕәеит аиндаҭлаҩ иаҵархара шҳалшо. Зегьы реиҳа ихадоу, ҳҽеидкыланы ҳаҟазароуп, ашҭаҿ ҳахәмарра дҳарбароуп. Ҳаҧхьаҟа иуадаҩӡоу 4 матчк ҳзыҧшуп, ҳәарада, излауа ала ирацәаны абаллқәа еизаҳгар ҳҭахуп“, – иҳәеит Вилли Саниоль.

Украинеи Қырҭтәылеи реизгақәа реиҧылара мҩаҧысуеит жьҭаара 11 рзы, ахәмарра иалагоит қарҭтәи аамҭала асааҭ  22:45 рзы. Аматч ишиашо атранслиациа жәбар шәылшоит  Қырҭтәыла Актәи аканалаҿ.