Шарль Мишель ишиҳәаз ала, Евроеидгыла Ахеилак Молдовеи, Украинеи, Қырҭтәылеи  ашықәс анҵәамҭанӡа Евроеидгылашҟа рыдкыларазы аиҿцәажәарақәа ралагара иалагароуп.

Европатәи ахеилак ахантәаҩы ари аҳәамҭа ҟаиҵеит Молдова ивизитаан имҩаҧигаз апресс-конференциаҿы.

«Еврокомиссиа Молдовеи, Украинеи, Қырҭтәылеи, иара убас, Мраҭашәаратә Балканқәеи  Евроеидгылашҟа ралалара апроцесс иазку анеҩстәи аҳасабырба цәырнагароуп.  Сара ашықәс анҵәамҭанӡа Европатәи ахеилак аҿаҧхьа ари азҵаара ақәыргылара сгәы иҭоуп.  Евроеидгыла Ахеилак Молдовеи, Украинеи, Қырҭтәылеи  ашықәс анҵәамҭанӡа Евроеидгылашҟа рыдкыларазы аиҿцәажәарақәа ралагара иалагароуп. Уи аполитикатә аӡбарахоит. Ашықәс анҵәамҭаз иҵоуроу аӡбара рыдыркылап ҳәа сгәыҕуеит», — иҳәеит  Шарль Мишель.

Иара иажәақәа рыла, Евроеидгылашҟа аинтеграциа Молдова ауааҧсыра хырҳагара ду рзаанагоит.

Иара убас,  Мишель Молдова анапхгара ирыбжьеигеит ареформақәа рынагӡара. Лымкаала, иара аӡбаратә реформеи, акоррупциа аҿагылареи, аҳәынҭқарратә институтқәа рдеполитизациеи дазааҭгылеит.