Қырҭтәыла апарламент ахантәаҩы Шьалуа Папуашвили Прага имҩаҧысуаз Евроеидгыла атәылақәа рпарламентқәа рхантәаҩцәа есышықәсатәи аконференциаҿ дықәгылеит.

Папуашвили даҽазнык ишьақәирҕәҕәеит Қырҭтәыла Украина ахьыҧшымреи аҵакырадгьылтә акзаареи ҕәҕәала ишадгыло.

«Урыстәыла ала гәымбылџьбарала, закәандарала Украина ажәылара амшала ҳара ҳазынтәгьы ашәарҭадара апроблема ҳазцәырҵит. Украина адгыларатә азеиҧш позициа аҵакы ду амоуп ари атәылаҿ аҭынчра ашьақәыргыларазы“, — иҳәеит Папуашвили.

Иара иажәақәа рыла, Қырҭтәыла ибзиаӡаны адыруеит иахьа Украина изакәытә рыцҳароу изҭагыло, избанзар, Қырҭтәыла урыстәылатәи агрессиа  иахысит 1990-тәи ашықәсқәеи  2008 шықәсеи рзы.

«Рыцҳарас иҟалаз, усҟан ааҧхьарақәеи агәҽанҵареи шыҟаҳҵозгьы, Мраҭашәарантә иахәҭоу ақәҿыҭра ҳамбеит. Аха, иахьа, насыҧла, лабҿаба иаабоит Европа зегьы еидгыланы урыстәылатәи агрессиазы  аҭак ҕәҕәа шыҟарҵаз.  Қырҭтәыла Украина иадгылоит ажәала мацара акәымкәа, аполитикатәи адипломатиатәи шьаҿақәа рылагьы.  Ақырҭуа аҵакырадгьылқәа импыҵахаланы ишыҟоугьы, километрқәак рыла Қарҭ иацәыхараны урыстәылатәи арбџьармчқәа закәандарала ишгылоугьы, ҳара иахьагьы Украина ҳадгылоит.

Қырҭтәыла арратә ескалациа ашәарҭара ду иҭагылоуп. Иара убас, иаҵшьны иазгәаҭатәуп Қырҭтәыла НАТО ашәарҭадаратә аҳаргь ала ишыхьчам, Евроеидгыла аекономикатә адгылара шамам, аха, Қырҭтәыла, уезгьы, жәларбжьаратәи аҩаӡараҟны Украина иадгылоит», — иҳәеит Шьалуа  Папуашвили.

Иара иажәақәа рыла, Қырҭтәыла Ассоциациатә трио аҟәыҭхара  агрессор дарҕәҕәоит.

«Евроеидгыла, агеополитикатә ахәмарҩы аҳасабала, ахатә роль анынанагӡаша аамҭа ааит, ҭоурыхла европатәи аҭаацәара иаҵанакәа атәылақәа рҭаххара иадгылароуп. Ҵыҧх, Қырҭтәыла европатәи аперспектива анашьара ала ҳареи Евроеидгылеи ҳаизыҟазаашьақәа рҿы аетап ҿыц иалагеит, Қырҭтәыла Евроеидгыла алалара амҩа ианылеит. Қырҭтәыла Евроеидгылазы игәрагоу партниорс иаанхоит, ашәарҭадара азҵаарақәа рҿы шәыдгылаҩцәа ҳреиуп“, — иҳәеит  Папуашвили.