«Аҳәаанырцә инхо ҳтәылауаа атәым иурисдикциаҿ иҟоуп, ақырҭуа ҳәынҭқарра уаҟа рыхьчара залшом, алхратә зин аганахьалагьы», — иҳәеит Қырҭтәыла апарламент ахантәаҩы Шьалуа Папуашвили.

Ажурналистцәа Папуашвили иазҵааит алхрақәа раан абжьыҭира иадҳәаланы аемигрантцәа ирзышьақәыргылоу  аҧҟарақәа рыҧсахра иазкны.

«Ҳара изныкымкәа иаҳҳәахьеит адунеи зехьынџьара егьырҭ атәылақәа рҿы имҩаҧысуа алхрақәа рҽалагалара афактқәа шырацәахаз. Ари иазгәарҭеит Америкеи Евроеидгыла еиуеиҧшым атәылақәеи.  2024 шықәсазы, алхрақәа раан, Евроеидгыла атәылақәа рхаҭарнакцәа, дара ирҭахыз алҵшәа роурц азыҳәан,  ҳалхрақәа рышҽаларгалоз ҳбеит. Евроеидгыла ацҳаражәҳәаҩ,  “Ақырҭуа гәахәтәы” иаҿагылаз акампаниа далахәын. Арҭ атәылақәа рҿы ҳтәылауаа ишрықәымҕәҕәо агәра ганы ҳаҟазар ҟалома? Абри аҩыза афактқәа иҟоуп.

Сара иацы исҳәеит: Михаель Рот, атәым усқәа рзы Бундестаг акомитет ахантәаҩы, Германтәыла анапхгара рхаҭарнак,  2024 шықәсатәи алхрақәа раҧхьа авидеонҵамҭа ҟаҵаны, ауаа рықәыҕәҕәара далахәын. Германтәыла аиҳабыра рхаҭрнак Қырҭтәыла атәылауаҩ  иаартны ианиеиҳәо: “Убжьы Ақырҭуа гәахәтәы иаумҭан” ҳәа, игәра угар ҟалома? Дара  “Амилаҭтә ҵысра” активистцәа рхы иадырхәон. Ҳара Америкагьы, Германтәылагьы, егьырҭ атәылақәа рҿгьы абри аҩыза афактқәа ҳбеит, адиаспора ахаҭарнакцәа рхаҭагьы  “Ақырҭуа гәахәтәы” адгылаҩцәа ирықәмақаруан Аҳәынҭқарратә департамент ма егьырҭ аусбарҭақәа рҿы шәыцәгьа ҳҳәоит, адепортациа шәзыруратәы иҟаҳҵоит ҳәа. 2024 шықәсатәи алхрақәа раҧхьа абри аҩыза афактқәа рацәан.

Ишаабаз еиҧш, Германтәыла анапхгара абри зегьы рымбозшәа ҟарҵеит, ишиашо алхрақәа рҽалагалара иақәҿрымҭит. Ҳара егьырҭ атәылақәа рҿы аеффективтә механизмқәа ҳамам. Убри аҟынтә, ҳдиаспора ақәыҕәҕәарантә ихьчазарц азыҳәан, аҧҟара ҿыцқәа шьақәҳаргылеит. Арҭ аҧҟарақәа адиаспора ахьыҕәҕәоу атәылақәа рҿы амч рымазаауеит  — Шәамахьтәыла,  Израиль, Ирландиа, Мальта. Уаҟа иҟоу адиаспора арҭ атәылақәа рҿиараҿы алагала ду ҟарҵоит. Ҳара иҳадаҳкылаз аҧсахрақәа ҳдиаспора рзинқәа рыхьчара иазкуп», — иҳәеит Шьалуа Папуашвили.