«Апрезиденттә ахан ақәлара адырҩаҽны, ҧасатәи ахада Зурабишвили аҳәамҭа ҟалҵан, ари афакт дақәыӡбит. Лара ишылҳәаз ала, апрезиденттә ахан ақәлара ацәгьауроуп ҳәа азакәӡам ари аҳәамҭа зыҟалҵаз, лара лгәаанагарала, абри ажәыларала, акциа алахәылацәа, Михаил Ҟавелашвили ахадас дазхарҵеит», — иҩит асоциалтә аҳаҿы Қырҭтәыла апарламент ахантәаҩы Шьалуа Папуашвили.

Папуашвили ишиҩыз ала, Саломе Зурабишвили иахьагьы, закәандарала, апрезиденттә символқәа руакы  — апрезиденттә  штандарт ныҟәылгоит.

«Зурабишвили  дахьцалакгьы, ари асимвол лыцуп. Еиуеиҧшым аҳәынҭқаррақәа рыцҳаражәҳәаҩцәа рҧылараан хаҧызарала абри аексклиузивтә символ аныҟәгара узыргәамҵша фактуп. Ҳәарада, ацҳаражәҳәаҩцәа закәандарала апрезиденттә штандарт рхы иадмырхәароуп. Ҳара уаанӡагьы игәаҳҭеит абри афактор арадикалцәеи аекстремистцәеи рыдгылара ишазку. Дара арадикализм адгылараҿы инарыгӡо ароль рзеилымкаауазар ҟалап, мамзаргьы, хықәкыла уи иалахәып.  Абри аҩыза азнеишьоуп жьҭаара 4 рзы аекстремистцәа гәызҭаҵагас ирзыҟалаз. Ҳҭоурыхаҿ раҧхьаӡа акәны, арадикалцәа апрезиденттә ахан иақәлеит.  Зурабишвилигьы маӡала уи дадгылон.   Аҳәаанырцәтәи аофициалтә хаҿқәа рыла Зурабишвили  «ллегитимра» ашьақәырҕәҕәара амшала, апучистцәа Зурабишвили Апрезиденттә аханаҿ дыртәаны,  «ареволиуциа» иалагар рҭахызар ҟаларын. Уамашәа иубаша, арадикалцәа рҳәаанырцәтәи  адгылаҩцәа рҟынтә аӡәгьы иахьанӡагьы апрезиденттә ахан ақәлара дақәымӡбит. Даргьы ари афакт азы аҭакҧхықәра рықәуп, избанзар, аҳәаанырцәынтә анапхгара зырҭо аполитикатә интригақәа роуп арадикалцәа Қырҭтәыла аҳәынҭқарратә аарҳәра аиҿкаара аҟынӡа иназгаз, — иҩит Шьалуа  Папуашвили.