Қырҭтәыла апарламент ахантәаҩы Шьалуа   Папуашвили  Азербаиџьан Милли Меџьлис ахантәаҩы Сахиба Гафарова  дылҧылеит. Ари аинформациа аланарҵәеит Қырҭтәыла апарламент апресс-центр.

Аиҧылараҿы иаҵшьны иазгәаҭан Қырҭтәылеи Азербаиџьани рҭоурыхтә аиҩызареи қәҿиарала имҩаҧысуа аганрацәалатә усеицуреи. Шьалуа  Папуашвили азербаиџьантәи аган ҭабуп ҳәа реиҳәеит Қырҭтәыла ахьыҧшымреи аҵакырадгьылтә акзаареи адгыларазы.

Папуашвили иажәақәа рыла, ҿыц иалху Қырҭтәыла апарламентаҿ раҧхьатәи аофициалтә визит мҩаҧысуеит, иара гәахәарала иазгәеиҭеит  Азербаиџьан Милли Меџьлис ахантәаҩы лвизит асимволтә ҟазшьа шамоу.

Аганқәа рхаҭарнакцәа азакәанҧҵаратә органқәа русеицура ибзианы иахцәажәеит.

Иара убас, Аахыҵ Кавказ арегионаҿ аҭагылазаашьа иалацәажәан, иаҵшьны иазгәарҭеит арегионаҿ аигәыларатә аизыҟазаашьқәеи, аҭынчреи, ашәарҭадареи рҵакы.  Аиҧылара алахәылацәа ишырҳәаз ала, астратегиатә ҵакы змоу арегионалтә проектқәа рынагӡара иазыхиоуп.

Сахиба Гафарова  Шьалуа  Папуашвили Азербаиџьанҟа ааҧхьара илҭеит.