Қырҭтәыла аиустициа аминистр Рати Брегаӡе иҳәамҭала,  Аҳәынҭқарратә шәарҭадара амаҵзура изныкымкәа иаанарҧшхьеит ибзианы аус ишауа, ашәарҭарақәа раҧыхра шалшо.

Брегаӡе иажәақәа рыла, атерракт аиҿкаареи атәыла анапхгара рыхҳәара аҽазышәареи иадҳәаланы имҩаҧысуа аусеилыргара қәҿиарала ихыркәшахоит.

«Азҵаарақәа рацәа раргаматәра зыҟамло иазкны иазгәасҭар сҭахуп, Аҳәынҭқарратә шәарҭадара амаҵзура аусура ахатә ҷыдарақәа шамоу, уи аҳәынҭқарратә амаӡа иадҳәалоуп. Сара агәра ганы сыҟоуп Аҳәынҭқарратә шәарҭадара амаҵзура ахаҭарнакцәа ажәлар аинформациа шрырҭо, аха, уи ҟарҵоит аҳәынҭқарратә шәарҭадара ҧырхагак азаамгакәа», — иҳәеит  Рати Брегаӡе.

Аҳәынҭқарратә шәарҭадара амаҵзура  Украина иҟоу Қырҭтәыла ҧасатәи анапхгара ачынуаа еиҿыркаауаз, аҧара ззоурышьҭыз,  апартиа Ақырҭуа гәахәтәы аҳаҭыртә хантәаҩы Биӡина Иванишвили ишьра аҽазышәара афакт азы аусеилыргара мҩаҧнагоит.