Ҭырқәтәыла, Сҭамԥыл ақалақь аҿы Қырҭтәылеи Ҭырқәтәылеи рыбжьара атуризм ахырхарҭала аусеицуразы аусуратә гәыԥ актәи аиԥылара мҩаԥган. Ауснагӡатә аҳәаақәа ирҭагӡаны, Аекономика аминистр ихаҭыԥуаҩ Мариам Қвривишвили дызхагылоу Қырҭтәыла аделегациа алахәылацәа Ҭырқәтәыла аиҳабыратәи хазхаҭалатәи асектор ахаҭарнакцәа ирԥылеит. Ҭырқәтәылатәи аган Ҭырқәтәылатәи ареспублика Акультуреи атуризми рминистр ихаҭыԥуаҩ Надир Альфаслан дахагылан.

Аекономика аминистрра аинформациала, аиԥылараҿ аганқәа ирыхәаԥшит Қырҭтәылеи Ҭырқәтәылеи рыбжьара атуризм ахырхарҭала аусеицура ашьаҭатәи хырхарҭақәа. Иаҵшьны иазгәаҭан атәыла аҳәынҭқарратәи хазхаҭалатәи асекторқәа рзааигәахара аҵакы.

Аганқәа ари ахырхарҭа аҿиара аперспективақәа ирыхәаԥшит. Аиԥылараҿ  атуризм ахырхарҭала аусеицура априоритеттә хырхарҭақәа ирызку адискуссиа мҩаԥган.