Ҳара, цқьа ҳазхәыцны, арационалтә шьаҿақәа ҟаҳҵоит. Европарламент аконкреттә алахәылацәа, аконкреттә биурократцәа, аконкреттә адәныҟатәи аусқәа рминистрцәа адемократиатә принципқәа еиларгоит.  Алхраҧхьатәи аизарақәа рҽаларгалон, ҳара уи ҳзақәшаҳаҭхом, избанзар, арҭ апроцессқәа еиҿызкаауа ҳдыруеит, ҳара уи ҳаҿагылароуп. Ҳара ареалполитикеи аобиективреи ихынҳәып ҳәа ҳгәыҕуеит, – иҳәеит Қырҭтәыла ахада Михаил Ҟавелашвили швеицариатәи аҭыжьымҭа  Neue Zürcher Zeitung аинтервиу анеиҭоз.

Атәыла ахада атәылауаа ргәынамӡареи апротесттә акциақәеи дрылацәажәан, ишиҳәаз ала, аконкреттә, аустә зҵаарақәа анықәдыргылалак, анапхгаратә гәыҧ Евроеидгылаҟны аиҿцәажәарақәа реиҭашьақәыргылара иазыхиоуп.

„Ҳәарада, уажәазы Қарҭ абри аҩыза алабҿабара иҟоуп, аха, ҳара арадикалтә шьаҿақәа ҟаҳамҵазҭгьы, аҭагылазаашьа иаҳа ицәгьахон. Ҳара аибашьра аҧырҟәҟәаара ҳалшеит. Евроеидгылаҟны аиҿцәажәарақәа аанаҳкылеит,  Бриуссель иаҳзықәдыргылаз аҳәарақәа рынагӡара ҳҭахымызт, избанзар, арҭ аҳәарақәа  аиҿцәажәарақәа ирыдҳәаламызт. Аконкреттә, аустә зҵаарақәа анықәдыргылалак, Евроеидгылаҟны аиҿцәажәарақәа реиҭашьақәыргылара ҳазыхиоуп. Дара апротесттә акциақәа рыла ареволиуциатә процессқәа мҩаҧыргар рҭахуп“, – иҳәеит Михаил Ҟавелашвили.

Иара убас, Қырҭтәыла ахада ишиҳәаз ала, атәыла аҩныҵҟатәи аусқәа  рҽалагалара ианаҟәыҵлак, хымҧада адискуссиа мҩаҧгахоит, Қырҭтәыла Европа иазаанаго, Европа Қырҭтәыла иазаанаго иалацәажәоит.

„ Ҳусқәа рҽалагалара ианаҟәыҵлак, хымҧада адискуссиа мҩаҧаагоит, Қырҭтәыла Европа иазаанаго, Европа Қырҭтәыла иазаанаго ҳалацәажәоит.  Ҳара цқьа ихәыцуа аоппозициа ҳамазҭгьы, ҳтәылауаа абарҭ азҵаарақәа ирыкны ирацәажәатәын. Швеицариа исоуз аҧышәа лабҿаба иснарбоит абри аҩыза атемақәа ишрылацәажәатәу“, – иҳәеит Ҟавелашвили.

Атәыла ахада иҳәамҭала, ақырҭуаа рхатә ҷыдарақәа рцәымӡроуп.