«Раҧхьа иргыланы, иаҵшьны иазгәаҭатәуп аҿиара иаҿу аҳәынҭқарреи Абжьаратә корридор иалахәы атәылеи  аҳасабала, Қырҭтәылазы аҵакы ҷыда шамоу аимадара еиқәзыршәо апроектқәа рылахәызаара», — илҳәеит Қырҭтәыла адәныҟатәи аусқәа рминистр Мака Боҷоришвили Индиа имҩаҧгаз апанельтә дискуссиа «Кавказ аҟынтә аҧшра» аҿы.

Аминистр ишылҳәаз ала, Қырҭтәыла аинфраструктуратә проектқәа аҧара рацәа рыланаҵоит, избанзар, аимадарақәа рырҭбаара иазку апроектқәа аҵакы ду рымоуп, Анаклиатәи абаҕәазагьы арҭ апроектқәа иреиуп.

«Қырҭтәыла зҵакы дуу 2 баҕәазак ҳамоуп – Ҧуҭи Баҭыми, аха, аҕба дуқәа рзы уи иазхом, убри аҟынтә, Анаклиатәи абаҕәаза апроект анагӡара ҳалагеит, уи  агеополитика адҳәалара ииашам ҳәа сгәы иаанагоит. Ашәарҭадара аганахьала проблемақәак шҳамоугьы, Қырҭтәыла – аинвестициақәа рзы атәыла бзиоуп, ганқәа зегьы аус рыцура ҳазыхиоуп. Анаклиатәи абаҕәазаҿ китаитәи аилахәыра мацара акәӡам аус зуа, аусурақәа рыхәҭак нанагӡоит бельгиатәи аилахәыра. Ари абаҕәаза акциақәа реиҳара ақырҭуа ҳәынҭқарра иатәуп», — илҳәеит  Боҷоришвили.