Ҳпартниорцәа акыршықәса рыҩныҵҟала Қырҭтәыла иаиуз апрогресс ахәшьара бзиа арҭоит, – илҳәеит Қырҭтәыла апарламентаҿы иҟоу Европаҟны аинтеграциа акомитет ахантәаҩы Мака Боҷоришвили.

Мака Боҷоришвили лажәақәа рыла,  Қырҭтәыла астратегиатә партниорцәа, Америкеи Евроеидгылеи, Қырҭтәыла аҵакырадгьылтә акзаареи европатәи аҧеиҧши уҳәа, атәылазы  астратегиатә ҵакы змоу азҵаарақәа рҿы Қырҭтәыла иадгылоит.

„Абарҭ аҩ-зҵаарак адекларациаҿы иарбоуп, ҳәарада, уи ҳара ҳзы аҵакы ду амоуп. Ҳара, ҳпартниорцәа рҟынтә иахәҭоу адгылара ҳмоур, ҳхықәкқәа ҳзынагӡом, абри ауп адекларациа изызку. Ибзиаӡаны ижәдыруеит Евроеидгылеи НАТОи рахь Қырҭтәыла аинтеграциа ареформақәа рацәа рымҩаҧгара ишадҳәалоу, абри ауп ҳазлацәажәо.  Иахьа уажәраанӡагьы, Қырҭтәыла, жәларбжьаратәи аиқәшаҳаҭрақәа рыла ахы иаднаҵаз аҧхықәрақәа зегьы нанагӡоит, убри аҟынтә, Евроеидгылахь аинтеграциа ахырхарҭала ҧхьаҟацаразы ашьаҭа ҕәҕәа ҳамоуп. Ҳпартниорцәа акыршықәса рыҩныҵҟала Қырҭтәыла иаиуз апрогресс ахәшьара бзиа арҭоит “, – илҳәеит Мака Боҷоришвили.

Америка-Евроеидгыла асаммитаҿ еицрыдыркылаз аҳәамҭа иацы аларҵәара аиуит. Аҳәамҭа иануп – „Қырҭтәыла ахьыҧшымреи, аҵакырадгьылтә акзаареи, евроатлантикатә перспективеи ҕәҕәала ҳадгылоит“.