Аекономикеи иҭышәынтәалоу аҿиареи рзы аминистр Леван Давиҭашвили Қырҭтәыла аенергетикатә сектор аҿы иҟоу атенденциақәеи, имҩаҧысуа ареформақәеи, идуу аинфраструктуратә проектқәеи дрылацәажәеит аекономикатә форум „Қырҭтәыла аенергетикатә политикеи, аенергошәарҭадареи, зырҿыцра ҟало аенергиеи“ аҿы.  Ари аинформациа аланарҵәеит Аекономикеи иҭышәынтәалоу аҿиареи рзы аминистрра.

Аминистрра адыррала, Давиҭашвили иаҵшьны иазгәеиҭеит аенергетикатә сектор атәыла аҿиаразы иамоу аҵакы ду. Аминистр ишиҳәаз ала,  аенергетикатә политика – атәыла аекономикатә политика ииашеи, аиара убас, ашәарҭадареи шьаҭас ирымоу хырхарҭоуп. Леван Давиҭашвили атәыла аенергошәарҭадара арҕәҕәареи, аенергобалансаҿ аҭыҧантәи афымца ахәҭа ацҵареи, аекспорт аизырҳареи дазааҭгылеит.

Леван Давиҭашвили иаҵшьны иазгәеиҭеит ари аусхкы хазхаҭалатәи аинвестициақәа  алаҵара зеиҧшҟамлац аҵакы шамоу. Иара иажәақәа рыла, аинвестициақәа реизырҳареи иаҳа ирацәаны аинвесторцәа рыдаҧхьалареи азҵаара уажәгьы актуалтә ҵакы амоуп.

„Ҳенергетикатә политикала иазҧхьагәаҭоуп хазхаҭалатәи аинвестициақәа рыдаҧхьалара, аха, аенергетикатә сектор ахатә ҷыдарақәа шамоу еилаҳкаауеит, араҟа хазхаҭалатәи асектор инаваргыланы, аҳәынҭқаррагьы ароль ду нанагӡоит. Егьырҭ аекономикатә секторқәа иреиҧшымкәа, аенергетикаҿы хазхаҭалатәи асектори аҳәынҭқарреи рдиалог аҵакы ду амоуп,“ – иҳәеит актәи авице-аҧыза.