Апартиа  «Лело» алидер Мамука Хазараӡе иҳәамҭала, Европатәи Ахеилак ахада Шарль Мишель апартиақәа ирыдигалаз адокумент дақәшаҳаҭуп, аха апартиа алахәылацәа аҵыхәтәантәи рпозициа аадырҧшаанӡа, аполитхеилак аҿы апунктқәа зегьы ирыхәаҧшроуп.

«Аиқәшаҳаҭхара ҳазаиагәахеит ҳәа сгәы иаанагоит. Аха, егьи аган  — «Ақырҭуа гәахәтәы» иахьа аиҿцәажәарашҟа имаит. Уи алагьы иубарҭоауп дара аиқәшаҳаҭхара шырҭахым, ҳҳәынҭқарреи ҳтәылауааи ишырҧырхагоу. Аиқәшаҳаҭранӡа шьаҿак ауп иаҳзаанхаз, нас атәылаҿы апроцесс ҿыц иалагоит. Америкеи Евроеидгылеи аиқәшаҳаҭра апунктқәа зегьы рынагӡашьа иахылаҧшуеит», — иҳәеит  Мамука Хазараӡе.

Иахьа Европатәи Ахеилак ахада Шарль Мишель идокумент ҿыц аладырҵәеит. Қырҭтәыла аполитикатә кризис аҭыҧқәҵара иазку адокумент аҿы ишазгәаҭоу ала,  сынтәа ҭагалан имҩаҧысуа ахаланапхгаратә органқәа рахь алхрақәа рҿы «Ақырҭуа гәахәтәы»  апропорциатә системала  43 наӡына рмоур, атәылаҿы изаамҭаным апарламенттә алхрақәа мҩаҧгахоит.