Сынтәа зҵакы дуу аинфраструктуратә проектқәа мҩаҧаагоит,  Русҭавели имҩаду ишеибгоу  еиҭашьақәҳаргылоит, –  иҳәеит Қарҭ ахада Каха Калаӡе ақалақьтә еиҳабыра реилатәараҿы.

Иара иажәақәа рыла,  Русҭавели имҩаду шьаҭанкыла ирыҧсахуеит,  амҩақәеи аҭоурыхтә хыбрақәеи дырҽеиуеит.

«Амҩаду шьаҭанкыла иҽаҧсахуеит,  адизаин ҳарҿыцуеит,  зылшарақәа маҷу ауаа ирзыманшәалоу аҭагылазаашьақәа зегьы еиҿаҳкаауеит. Агәра ганы сыҟоуп арҭ аусурақәа рышьҭахь Русҭавели имҩаду иаҳа ишыҧшӡахо. Уаҟа иҟоу ахыбрақәеи аргыламҭақәеи реиҭашьақәыргылара ҳгәы иҭоуп. Ахыбрақәа рацәа акультуратә ҭынхара иаҵанакуеит. Аусурақәа аҩбатәи аетапла иазҧхьагәаҭоуп абаҟақәа реиҭашьақәыргылара, арҭ аусурақәа рзы шықәсқәак аҭаххоит, избанзар, ҳара, афасадқәа мацара ракәымкәа, Русҭавели имҩадуаҿ ахыбрақәа зегьы реиҭашьақәыргылара ҳгәы иҭоуп», — иҳәеит  Калаӡе.