«Ақырҭуа гәахәтәы»  амаӡаныҟәгаҩ хада Каха Калаӡе ишиҳәаз ала,  Саломе Зурабишвили иҟалҵаз аҳәамҭақәа рыхцәажәара иҭахым.

Иара ишазгәеиҭаз ала, анапхгаратә партиа ахада иинститут ҳаҭырла иазныҟәоит.

«Атәыла ахада ажәа лымаскыр сҭахым. Ҳтәыла аинтересқәа роуп ихадоу, ҳәарада, сара атәыла ахада иинститут сеиҷаҳауеит.

Дарбанызаалак аполитик ма апартиа атәыла аинтересқәа ирықәныҟәалароуп, атәыла аҿиара иацхрааша ашьаҿақәа ҟарҵалароуп, аполитикцәа зегьы уи еилыркаароуп», — иҳәеит Калаӡе.

Ажурналист изҵаара аҭак анеиҭоз Калаӡе ишиҳәаз ала, евроинтеграциа апроцесс, изакәызаалак ак ала Михаил Саакашвили ма Ника Гварамиа  ирыдҳәалам.

Иахьа  «Ақырҭуа гәахәтәы» аполитхеилак иҟанаҵаз аҳәамҭаҿ ишазгәаҭоу ала, атәыла ахада лхаҭа ахада иинститут ахьӡ шылалырҟәогьы, ари аинститут хымҧада ихьчатәуп.