«Мраҭашәаратә Қырҭтәыла  5 стадионк рыргылареи рырҿыцреи апроцесс ахыркәшаранӡа инеихьеит.  Аусурақәа рышьҭахь, Қәҭешь аиуеит  УЕФА аҧшьбатәи иреиҳаӡоу акатегориа иаҵанакәа астадион,  уаҟа иарбанызаалак ахәмаррақәа рымҩаҧгара ҟалоит», — иҳәеит арегионалтә аҿиареи аинфраструктуреи рзы аминистр Иракли Қарселаӡе  аиҭашьақәыргыларатә усурақәа шымҩаҧысуа аниба ашьҭахь.

Арегионалтә аҿиареи аинфраструктуреи рзы аминистрра адыррала,  Қарҭ иҟоу Михаил Месхии Борис Паиҷаӡеи рыхьӡқәа зху астадионқәеи  Рамаз Шенгелиа ихьӡ зху Қәҭешьтәи астадиони Европа аҿартә чемпионат амҩаҧгаразы еиқәыршәоуп.   Зыӡбахәы ҳәоу астадионқәа зегьы УЕФА астандартқәа ирышьашәалоуп.

Аминистрра адырра ишану ала,  аргыларатә усурақәа мҩаҧнагеит Арегионалтә аҿиареи аинфраструктуреи рминистрра Амуниципалтә аҿиара афонд. Қырҭтәыла аиҳабыра арҭ аусурақәа ирзоурышьҭит  100 миллион лари. Аусурақәа рымҩаҧгара иахылаҧшуан УЕФА.

Европа аҿартә чемпионат Қырҭтәылеи Румынәтылеи имҩаҧысуеит рашәара 21 инаркны ҧхынгәы  8-нӡа. Қырҭтәыла ахәмаррақәа мҩаҧысуеит 3 қалақьк рҿы  —  Қарҭи,  Қәҭешьи,  Баҭыми.