Апарламенттә аиҳара алидер Иракли  Кобахиӡеи  адәныҟатәи аусқәа рзы апарламенттә комитет ахантәаҩы Николоз Самхараӡеи, Германтәыла рофициалтә визит аҳәаақәа ирҭагӡаны, Бундестаг адепутат,  адәныҟатәи аполитика азҵаарақәа рзы Ақьырсиан – демократиатә еидгыла амаӡаныҟәгаҩ Родрих Кизеветтер иҧылеит.

Аганқәа рхаҭарнакцәа Афганистан имҩаҧысуа НАТО амиссиаҿы Қырҭтәыла ароль иалацәажәеит. Родрих  Кизеветтер иаҵшьны иазгәеиҭеит ақырҭуа арратә маҵзуҩцәа рпрофессионализм. Иара ишиҳәаз ала, уи НАТО ашҟа Қырҭтәыла адкыларазы крызҵазкәа аргументуп.

Аганқәа рхаҭарнакцәа ишазгәарҭаз ала, атәылақәа реизыҟазаашьақәа иреиҳаӡоу аҩаӡараҟны иҟоуп, апандемиа ашьҭахь арҭ аизыҟазаашьақәа иаҳа иҭбаатәуп.

«Ҳара Евроеидгыла ашҟа аинтеграиазы иҟаҵатәу ашьаҿақәа ҳрылацәажәеит. Германтәыла Қырҭтәыла иадгылоит европатәи ареформақәа рымҩаҧгара аплан анагӡареи Евроеидгыла алалара иазку аҽазышәареи аҿы», — иҳәеит Николоз Самхараӡе аиҧылара ашьҭахь.