Леван Изориа иусумҭа – „Азинтәи аҳәынҭқарратәи хәыцшьа“ ақырҭуа иуристцәа рзы зҵакы дуу  шәҟәуп, – иҳәеит Қырҭтәыла аҧыза-министр Иракли Кобахиӡе Леван Изориа ишәҟәы аӡыргараҿы данықәгылоз.

Аиҳабыра рнапхгаҩы иажәақәа рыла, ари ашәҟәы ацхыраарала, ақырҭуа иуристцәа  азин афилософиа, азиндырра, Аконституциа атеориа уҳәа, еиуеиҧшы азҵаарақәа рзы рдырра еиҕьартәыр рылшоит.

Аҧыза-министр Леван Изориа иквалификациа ду азгәаҭаны, ишиҳәаз ала, иара иусумҭа азинтә хәыҵшьа аҵакы ду ахьамоу аусхкқәа рҿы аус зуа ауаа рзы аҵакы ду амоуп.

„Адунеи амасштабла, аглобалтә аҩаӡараҟны, азинтә принципқәа ракәымкәа, аполитикатә интересқәа роуп иаҳа-иаҳа аҧыжәара зауа. Ари атенденциа ҽеим. Леван Изориа ишәҟәы аҵакы ду амоуп, избанзар, ҳтәылаҿы аполитика акәымкәа, азинтәи аҳәынҭқарратәи хәыцшьа иаҳа аҧыжәара амазароуп“, – иҳәеит Иракли Кобахиӡе.

Аиҳабыра рнапхгаҩы аҵара аусхкы аҿы иҟоу апроблемақәа дырзааҭгылан, ишиҳәаз ала, иреиҳаӡоу аҵара асистема, аиуристтә аҵара ахырхарҭалагьы, излауа ала еиҕьхарц азыҳәан иаҭаху зегьы ҟаҵатәуп.

Амилаҭтә библиотекаҿы имҩаҧгаз Леван Изориа ишәҟәы аӡыргараҿы иҟан Қырҭтәыла анагӡаратәи, азакәанҧҵаратәи, аӡбаратәи мчра алахәылацәеи, Апатриархиа ахаҭарнакцәеи, аиуристцәеи, аҵарауааи.