Қырҭтәыла аҧыза-министр Иракли Кобахиӡе Европатәи аполитикатә уаажәларра асаммит аҳәаақәа ирҭагӡаны имҩаҧгаз аишәа гежь ихы алаирхәит.

Қырҭтәыла аиҳабыра рдыррақәа рыла, аҧыза-министр иаҵшьны иазгәеиҭеит адунеи ҕәҕәа азыҳәан Европа ҕәҕәа ҵакыс иамоу, насгьы аҵыхәтәантәи атенденциақәа ирыдҳәаланы агәамҵра ааирҧшит.  Иракли Кобахиӡе иажәақәа рыла, европатәи аҳәынҭқаррақәа рацәа рхатә милаҭтә ҷыдарақәа рцәыӡра ашәарҭара иҭагылоуп, убри аамҭазы, Европа ахатә партниорцәа рыхьчара алшара ацәыӡуеит.

«Ари аконтекст аҿы, аҧыза-министр, Украина ҿырҧштәыс иааганы, аибашьра иахылҵуа алҵшәақәа дырзааҭгылеит. Иара ишазгәеиҭаз ала, абри аҩыза аҭагылазаашьаҿы егьырҭ атәылақәа ишыхьчазаауа азы агарантиақәа рымам. Аиҳабыра рнапхгаҩы Қырҭтәыла ақәҿиарақәа дрылацәажәан, иаҵшьны иазгәеиҭеит ииашамкәа атәыла азныҟәара шыҟамло, ари азныҟәашьа шыҧсахтәу», — иануп Қырҭтәыла аиҳабыра ринформациаы.

Иракли  Кобахиӡе ишиҳәаз ала, Қырҭтәыла, акритериқәа зегьы рыла, акандидат астатус зауз егьырҭ атәылақәа раҧхьа игылоуп, убри аҟынтә, Қырҭтәыла ииашамкәа азныҟәара европатәи аинститутқәа римиџь ланарҟәоит.

Аҧыза-министр иҳәамҭала, Европаҿ акрызҵазкәа аиҭакрақәа ҟалап, Европа иаҳа иҕәҕәахап  ҳәа дгәыҕуеит, уи жәларбжьаратәи аиҿкаара ахьчаразы зда ҧсыхәа иҟам ҭагылазаашьоуп.

Аишәа гежь рхы аладырхәит Британиа Дуи, Швециеи, Лиуқсембурги, Нидерланди, Польшеи, Словакиеи, Шәамахьтәылеи, Естониеи рҧыза-министрцәеи, Украинеи Бырзентәылеи, Европатәи Ахеилаки, Европарламенти рхадацәеи, иара убас, ОБСЕ Амаӡаныҟәгаҩ Хадеи.