«Атәыла аҭынчратә иҭышәынтәалоу аҿиара нагӡахоит, абри аҩыза апроцессқәа зны-зынла ауадаҩрақәа рхылҵуеит», — иҳәеит Қырҭтәыла аҧыза-министр Иракли Кобахиӡе аиҳабыра радминистрациаҿы имҩаҧгаз апресс-конференциаҿы.

Иара иажәақәа рыла, лари акурс аҭышәынтәалахара иалагеит, аекономикатә аҿиара акгьы иаҧырхагахом.

«Ишыжәбаз еиҧш, лари акурс аамҭакьаҿла аҽаҧсахит, аха, амчылара ианаҟәыҵҵәҟьа, акурс алаҟәхара иалагеит,  аҵыхәтәантәи амшқәа ирҿаҳарҧшыр, иахьа акурс шкаҳаз жәбеит. Еснагь абасоуп ишыҟало. Аҵыхәтәантәи ҧшышықәса рыла ҧшьынтә «амилаҭтә Маидан» аиҿкаара аҽазкрақәа иҟан, акурс еснагь ишьҭыҵуан, аха, аҭагылазаашьа аҭышәынтәалара ашьҭахаь, акурс  лаҟәхон. Уажәгьы абасоуп аҭагылазаашьа шыҟоу. Ҳәарада, аекономикатә аҿиареи уи иҭышәынтәалоу азҳареи акгьы иаҧырхагахом.

Сынтәатәи  10 мза рылҵшәақәа ҳрыхәаҧшыр,  10 наӡына азҳара ҳамоуп. Ҳара Европеи иаҳа иҭбаау  арегиони рҿы  актәи аҭыҧ аанаҳкылоит, ашықәс анҵәамҭанӡа иҳаракӡоу арбага ҳамазаауеит. Ҳәарада, ҳаҧхьаҟагьы аекономикатә азҳара ду нагӡахоит», — иҳәеит аҧыза-министр.