«Зҵакы дуу аӡбара ҳадаҳкылеит, уи апациентцәа иаҳа ирзыманшәалоу амедицинатә маҵзура аҧҵара иазкуп, лымкаала,  апациентцәа зегьирзеиҧшу агәабзиарахьчара апрограмма, мамзаргьы, зегьиреиҧшу агәабзиарахьчара апрограмма иалымҵкәа, ахәцҵа амеханизм ҿыц  рхы иадырхәар рылшоит», — иҳәеит Қырҭтәыла аҧыза-министр Иракли Кобахиӡе аиҳабыра реилатәараҿы.

Аҧыза-министр иажәақәа рыла, апациент  апрограммала иазҧхьагәаҭоу афинансыркра наӡа иоуеит, аха, иара ииҭаху  VIP-маҵзура мацара ахә ишәоит.

«Абри аҩыза азнеишьа, ганкахьала, апациентцәа рфинанстә ҭагылазаашьа еиҕьнатәуеит, избанзар, зқьҩыла апациентцәа даҽа медицинатә маҵзурак роур ахьырҭаху амшала зегьирзеиҧшу агәабзиарахьчара апрограмма алҵра рықәшәом, ҧаса иҟаз апҟарақәа рыла уи еиҧш алшара иҟамызт.  Егьи аганахьала, ари асистема абзоурала,   иаҭаху амедицинатә манипулиациақәа рхархәара иаҳа иманшәалахоит», — иҳәеит аҧыза-министр.

Аиҳабыра рнапхгаҩы иҳәамҭала, амаҵзуразы ахәцҵа ашәара аҭагылазаашьақәа, амаҵзура цыҧхьаӡазы алимтқәагьы,  ҳәаақәҵахоит аминистр идҵала.