«Ҳара атуризм ахырхарҭала зеиҧшҟамлац атенденциақәа ҳамоуп, аҵыхәтәантәи 12 шықәса рзы асасааирҭақәа рхыҧхьаӡара хынтә иазҳаит», — иҳәеит Қырҭтәыла аҧыза-министр Иракли Кобахиӡе Сиони асасааирҭа ҿыци аҧсшьаратә комплекси апроект аӡыргараҿы данықәгылоз.

Аиҳабыра рнапхгаҩы ишиҳәаз ала,  2012 шықәсазы атәылаҿ  800 раҟара аотельқәа аус руан, аҵыхәтәантәи адыррақәа рыла, атуристтә сектор иацлеит даҽа  1600 раҟара аотельқәа.

«Здаҟам асасааирҭатә комплекс аргылара иаҿуп, ауаа аҧсшьара рылшарц азыҳәан аҭагылазаашьақәа зегьы иҟазаауеит. Инеизакны иуҳәозар, абренд  Le MERIDIEN  атуризм ахырхарҭала аинициатива ҿыцқәа рзы аҵакы ду амоуп. Ари аҭыҧ ссируп, ҳаиҳара Сиони аӡиас аҿы ҳхәыҷра зегьы мҩаҧаагеит, араҟа  асасааирҭатә инфрастурктура аҧҵаразы здаҟам аҭагылазаашьақәа иҟоуп», — иҳәеит  Иракли Кобахиӡе.

Аҧыза-министр аилахәыра «Арки» ахаҭарнакцәеи, апроект авторцәеи, уи анагӡара иалахәыз ауааҧсыреи ҭабуп ҳәа реиҳәеит.