2030 шықәса рзы Қырҭтәыла Евроеидгыла алалара зынагӡара ҟало усуп, – иҳәеит Қырҭтәыла аԥыза-министр Иракли Кобахиӡе Euronews аинтервию аҿы.

Иракли Кобахиӡе иинтервию аҿы ишазгәеиҭаз ала, аӡбамҭа адкылара Бриуссель алшоит, аидгыла алахәыла ҿыц иганахьала аихышәашәара аарԥштәуп. Иара иажәақәа рыла, Қырҭтәыла европатәи абиурократиа аҿаԥхьа акыр зҵазкуа аԥышәарақәа амоуп, аха иара агәыӷра ду имоуп 2030 шықәсазы атәыла Евроеидгыла алалара шалыршахо.

“Ҳара амҩахыҵра ҳгәы иҭам, ахықәкы анагӡаразы иҳалшо згь ҟаҳҵоит, иашьҭанеиуа ашықәсқәа рзы Қырҭтәыла аганахьала иаҳа ииашоу азнеишьа алырхуеит ҳәа сгәыӷуеит”, – иҳәеит аԥыза-министр.

Еврониус ишаанацҳаз ала, Иракли Кобахиӡе иажәақәа рыла, иахьа Қырҭтәылеи Евроеидгылеи рыбжьара аизыҟазаашьа реицәахара зыхҟьаз ақырҭуа политика акәӡам, Қырҭтәыла аганахьала имҩаԥырго европатәи абиурократиатә политика ауп, ари аполитика аҽаԥсахыр, зегьы ԥсаххоит ҳәа.