Иракли Ҕарибашвилии Виктор Орбани Венгриеи Қырҭтәылеи рыбжьара астратегиатә партниорра иазку арезолиуциа рнапы аҵарҩит

Қырҭтәыла аҧыза-министр Иракли Ҕарибашвилии Венгриа аҧыза-министр Виктор Орбани Венгриеи Қырҭтәылеи рыбжьара астратегиатә партниорра иазку арезолиуциа рнапы аҵарҩит.

Қырҭтәыла аиҳабыра рпресс-маҵзура адыррала,    иахьа, Венгриа аҧыза-министр иадминистрациаҿы, Қырҭтәыла аҧыза-министр  иҧылара аофициалтә церемониа мҩаҧган, инагӡан ҩ-тәылак рхьыӡрашәақәа.

Қырҭтәыла Евроеидгыла алаларазы акандидат астатус анашьареи, атәыла аҵакырадгьылтә акзаареи, ҩ-тәылак рыбжьара аганрацәалатә економикатә усеицуреи иалацәажәеит Қырҭтәыла аҧыза-министр Иракли Ҕарибашвилии Венгриа аҧыза-министр Виктор Орбани ишиашоу реиҧылареи, анеҩс, ирҭбаау аформатаҿ имҩаҧгаз аиҧылареи аҿы.

Аганқәа рхаҭарнакцәа евроинтеграциа апроцессаҿы Қырҭтәыла ақәҿиарақәа ирзааҭгылеит. Қырҭтәыла аҧыза-министр ишиҳәаз ала,  Евроеидгыла алалара апроцессаҿ излауа ала ирласны апрогресс аиуразы, атәыла аиҳабыра рхы иадырҵаз аҧхықәрақәа рынагӡара иазыхиоуп.

Аиҧылараҿы ишазгәаҭаз ала, Венгриа Қырҭтәыла ахьыҧшымреи аҵакырадгьылтә акзаареи ҕәҕәала иадгылоит, Иракли Ҕарибашвили уи азыҳәан венгриатәи иколлега ҭабуп ҳәа иеиҳәеит, иара убас, иаҵшьны иазгәаҭан Евроеидгыла Анаҧшцәа рмиссиаҿы Венгриа иҟанаҵо алагала ду.

Аганқәа рхаҭарнакцәа Қырҭтәылеи Венгриеи рыбжьара аекономикатә усеицура иазааҭгылан, ишазгәарҭаз ала, сынтәа атәылақәа рыбжьара ахәаахәҭратә аикәшара ҩынтә иазҳаит. Аиҧылара алахәылацәа ари ахырхарҭала апроект ҿыцқәеи атәылақәа рыбжьара аекономикатә усеицура иаҳа арҭбаара иацхрааша наҟ-наҟтәи апланқәеи ирылацәажәеит. Иара убас, аиҧылараҿы иаҵшьны иазгәаҭан Амшын еиқәаҿы аимадара арҭбааразы аусеицура ахымҧадара. Ишырҳәаз ала, европатәи апартниорцәеи европатәи афинанстә институтқәеи рылахәызаара ала, Амшын еиқәа апотенциал инаӡаны ахархәара рылшоит.

Аганқәа рхаҭарнакцәа арегионалтә шәарҭадарагьы  иалацәажәеит.

Аиҧылара ашьҭахь, Қырҭтәыла аҧыза-министр Иракли Ҕарибашвилии Венгриа аҧыза-министр Виктор Орбани Венгриеи Қырҭтәылеи рыбжьара астратегиатә партниорра иазку адекларациа рнапы аҵарҩит.