Қырҭтәыла аҭоурыхаҿ идуӡӡоу аинвестициа –  адевелопертә еилахәыра  Emaar Properties/Eagle Hills Қырҭтәыла иаланаҵоит 6 миллиардк адоллар иаҟароу аинвестициа, – зыӡбахәы ҳәоу аилахәыреи ақырҭуа агани аусеицура амеморандум рыбжьарҵеит Қырҭтәыла аҧыза-министр Иракли Кобахиӡе Абу-Даби имҩаҧиго авизит аҳәаақәа ирҭагӡаны.

Анапаҵаҩра ацеремониа мҩаҧган Иеиду Араҧтәи Емиратқәа рхада ирезиденциаҿы, ацеремониа рхы аладырхәит Қырҭтәыла аҧыза-министр Иракли Кобахиӡеи Иеиду Араҧтәи Емиратқәа рхада, ашеих Моҳамед бин Заиед Аль Наҳиани.

Қырҭтәыла ахьӡала адокумент рнапы аҵарҩит актәи авице-аҧыза, аекономикеи иҭышәынтәалоу аҿиареи рзы аминистр Леван Давиҭашвилии Аҷаратәи автономтә республика аиҳабыра рхантәаҩы Ҭорнике Рижваӡеи. Аилахәыра аган аҟынтә – уи ашьаҭакҩи анапхгаратә директори Моҳамед Али Рашед Алабар.

Қырҭтәыла аҭоурыхаҿ зегьы реиҳа идуу аинвестициа иазку аиқәшаҳаҭрала иазҧхьагәаҭоуп Қырҭтәылаҿ идуу адевелопертә аинвестициатә 2 проектк рынагӡара. Аекономикеи иҭышәынтәалоу аҿиареи рзы аминистрреи Аҷаратә автонмтә республика аиҳабыреи мызқәак ирылагӡаны ари апроект аус адырулоит, заанаҵтәи аҭҵаареи ахәшьараҭареи хыркәшоуп, адевелопертә проект дуқәа Қарҭи Гониои инарыгӡоит.

Қырҭтәыла аиҳабыра рнапхгаҩы ишиҳәаз ала, абри аҩыза аинвестициа ду абзоурала, ҳтәылаҿы адевелопертә сектор аҿиара апроцессаҿ аетап ҿыц иалагоит.

“Иахьа ҳнапы зҵааҩыз амеморандум ала иазҧхьагәаҭоуп ҳтәылаҿы зеиҧшҟамлац ала идуу, ф-миллиардк адоллар иаҟароу аинвестициа амҩаҧгара. Ари аҧара Қырҭтәыла иаланаҵоит аинвестициатә усхкы аҿы аҧышәа дуӡӡа змоу аилахәыра  — EMAAR Group.  Аинтерес ду зҵоу амультифункциатә адевелопертә проект наҳагӡоит, Қарҭи, иара убас, Баҭыми Гониои амультифункциатә инфрасруктура аҿиара аиуеит. Абри зегьы ҳтәыла аекономика аҿиара иацхраауеит, аекономикатә азҳара аласра азнарҳауеит, аусуратә ҭыҧ ҿыцқәа аҧнаҵоит, насгьы, ҳтәылашҟа егьырҭ аинвесторцәагьы аднаҧхьалоит.

Ҳпартниорцәеи, ҳҩызцәеи, Иеиду Араҧтәи Емиратқәа рнапхгареи, EMAAR-гәыҧи, уи анапхгаҩы, ҳаҭыр зқәу Алабари, рызынтәгьы аусеицура ҕәҕәеи иахьатәи аиқәшаҳаҭареи азыҳәан ҷыдала ҭабуп ҳәа расҳәар сҭахуп, ари аиқәшаҳаҭра ҳтәыла аекономикатә аҿиаразы аҵакы ду амоуп,“- иҳәеит аҧыза-министр.