Ҳельсинктәи акомиссиа   «Урыстәыла аган аҟынтә акыраамҭатәи ашәарҭаразы аҽазыҟаҵара» захьӡу аҳасабырба цәырнагеит, уаҟа Қырҭтәылагьы аӡбахәы рҳәоит.

Адокумент ишану ала, уажәазы Аахыҵ Кавказ  арегион зегьы ахатә ҭоурыхаҿ зҵакы дуу аамҭа иҭагылоуп, алшарақәеи ашәарҭақәеи рыбжьара.

«Қырҭтәыла аҭагылазаашьа акомплекстә ҟазшьа амоуп. Акыршықәса рыҩныҵҟа Қырҭтәыла, Аахыҵ Кавказ арегионаҿ мраҭашәара адгылаҩ ҕәҕәас иҧхьаӡан, Евроеидгылеи НАТОи ралалара иазҿлымҳан. Аха, уажәааны иҟалаз ахҭысқәа лабҿаба иаадырҧшит  Қырҭтәыла аиҳабыра иаартны мраҭашәара ишаҿагыло», — иануп адокумент аҿы.

Ҳельсинктәи акомиссиа аихшьаалаҿы иаҵшьны иазгәаҭоуп Қырҭтәыла ауааҧсыра реиҳара, ҧасеиҧш, евроатлантикатә интеграциа ишадгыло, убри амшала, атәыла аиҳабыреи ажәлари рҳәатәы шеқәымшәо.
Америка ахымҩаҧгашьа иазкны адокумент ишану ала,  Америка иҩбоу азнеишьа астратегиа иақәныҟәароуп.  Уи ала иазҧхьагәаҭоуп адемократиа шьҭахьҟа ацара амшала атәыла аиҳабыра аҭакҧхықәра рыдҵареи,  иара убас, мраҭашәаратә институтқәа рахь аинтеграциа амеханизмқәа рхархәареи, уи адемократиатә напхгараҭара архынҳәра иахьыҧшызаауеит.

«Абри аҩыза астратегиа атәыла анапхгареи ауааҧсыреи рҳәатәеиәқымшәара армаҷреи иаҳа иҭышәынәталоу аконструктивтә еизыҟазаашьақәа рышьақәыргылареи иацхраауеит», — иануп Ҳельсинктәи акомиссиа аҳасабырбаҿы.