Агәыларатә политикеи арҭбаара азҵаарақәеи рзы Еврокомиссиа агенералтә директор Герт Иан Коопман иҳәамҭала, Қырҭтәыла аиҳабыра имҩаҧырго аполитика Евроеидгыла апринципқәа  ирышьашәалам.

Герт Иан Коопман ари аҳәамҭа ҟаиҵеит Европарламент адәныҟатәи еизыҟазаашьақәа ркомитет аилатәараҿы.

Иара ишазгәеиҭаз ала,  хымҧада инагӡатәу жә-шьаҿак рынагӡара аганахьала апрогресс хәыҷӡоуп.

„Ҵыҧх ари атәыла акандидат астатус анарҭа уи ҳгәы аздуун, атәым агентцәа ирызку азакәани егьырҭ ахҭысқәеи ари амҩа ишаҧырхагоу лабҿаба иубарҭоуп. Атәыла Евроеидгыла иацәыхарахеит ҳәа анаҳҳәо, иаҵшьны иазгәаҭатәуп ақырҭуа жәлар Евроеидгыла ишацәахарамхаз. Шәуааҧсыра реиҳара, 80 – 90 наӡына, евроинтеграциа рҭахуп, убри аҟынтә, атәыла аиҳабыра имҩаҧырго аполитикоуп проблемас иҟоу.

Хымҧада инагӡатәу жә-шьаҿак рынагӡара аганахьалагьы апрогресс хәыҷӡоуп. Ҳәарада, ари аҭагылазаашьа алҵразы абжьагарақәа рыҟаҵара наҳагӡоит. Ари аҭагылазаашьа ириашатәуп, убри азыҳәан, раҧхьа иргыланы, атәым агентцәа ирызку азакәан иаҧыхтәуп, избанзар, уи европатәи апринципқәа ирышьашәалам. Аихшьаала аҳасабала иазгәасҭар сҭахуп ҳара ақырҭуа жәлар ҳашрыдгыло, атәыла аиҳабыра имҩаҧырго аполитикоуп проблемас иҟоу. Ишыздыруа ала, анеҩстәи амзазы атәылаҿ апарламенттә алхрақәа мҩаҧысуеит“, – иҳәеит Герт Иан Коопман.