Европарламентаҿ иҟоу аполитикатә гәыҧқәа Қырҭтәыла иадҳәаланы арезолиуциа апроект рыдыркылеит. Лымкаала, апроект дырмазеит абарҭ аполитикатә аидҵарақәа: «Европатәи жәлар рпартиа», «Асоциал-демократцәа», «Ирҿыцу Европа», «Аиаҵәақәа  — Зхы иақәиҭу европатәи алианс» ,  «Европатәи аконсерваторцәеи ареформисттә гәыҧқәеи».

Арезолиуциа апроект авторцәа иреиуп  — Мириам Лексман, Маикл Галлер, Раса Иукниавичене, Девид Макаллистер, Андриус Кубилиус, Свен Миксер, Маркета Грегорова, Анна Фотига.

Арезолиуциа апроект ишану ала,  «Атәым анырра аартызаара иазку» азакәан Евроеидгыла алаларазы акандидат тәыла аҳасабала  Қырҭтәыла ахы иаднаҵаз аҧхықәрақәа ирышьашәалам.

Европатәи апарламент «Атәым анырра аартызаара иазку» азакәанпроект  аҩынтәраан апарламентаҿ ацәыргара афакт иааҧҵәаны иақәыӡбоит, избанзар, дара ргәаанагарала,  ари азакәанпроект атәылауаҩратә уаажәларреи ихьыҧшым АИХқәеи рхы иақәиҭны аусураҿы ирҧырхагахоит.

Апроект ишану ала,  ари азакәан Қырҭтәыла азинеиҿкаара хәҭас иахьынӡаҟало, Евроеидгыла, Қырҭтәылаҟны  аиҿцәажәарақәа  иаламгароуп.

Европарламент  даҽазнык Қырҭтәыла апарламентахь ааҧхьара ҟанаҵеит  ари азакәан адкылара иадҳәалоу апарламенттә процедурақәа ааныркыларц.