Европарламент Қырҭтәыла иазкны арезолиуциа аднакывлеит. Арезолиуциа хьӡыс иамоуп «Қырҭтәыла аполитикатә ҭагылазаашьа ацәгьахара иазкны».

Арезолиуциа иадгылеит  400ҩык адепутатцәа, 63ҩык иақәшаҳаҭымхеит, 81ҩык рҽааныркылеит.

«Европарламент адепутатцәа: Қырҭтәыла ахаҧшьгаратә еиҳабыра алегитимра рымам. Европарламент Саломе Зурабишвили Қырҭтәыла азакәантә ахадас дазханаҵоит. Европарламент Евроеидгылахь ааҧхьара ҟанаҵоит ақырҭуа политикцәа асанкциақәа рзышьақәыргылареи Қырҭтәыла акризис алҵразы мҩа заҵәыс иҟоу аҿыц алхрақәа рымҩаҧгареи азы.  Европарламент адепутатцәа жәларбжьаратәи ауаажәларрахь ааҧхьара ҟарҵоит  Қырҭтәыла адемократиа иаҧырхагоу, арепрессиақәа мҩаҧызго  Қырҭтәыла ахаҧшьгаратә еиҳабыра абоикот рзырурц.  Европарламент адепутатцәа Саломе Зурабишвили Қырҭтәыла азакәантә ахадас дазхарҵоит, Европатәи Ахеилак ахада Антониу Кошта иахь ааҧхьара ҟарҵоит Европатәи Ахеилак аилатәарақәа рҿы Қырҭтәыла ахаҭарнакра азуразы Саломе Зурабишвили дааиҧхьарц.  Европарламент адепутатцәа ргәаанагарала, Ахеилаки алахәыла-тәылақәеи Қырҭтәыла адемократиатә регрессиеи, алхрақәа рҧаршеиреи, ауаҩытәыҩса изинқәа реилагареи, аполитикатә оппонентцәеи активистцәеи рышьҭацалареи рзы аҭак зыҧхықәу аполитикатә хаҿқәа асанкциақәа рзышьақәыргылатәуп. Зыӡбахәы ҳәоу ахаҿқәа иреиуп еицырдыруа аолигарх Биӡина Иванишвилии, аҧыза-министр  Иракли  Кобахиӡеи, апарламент ахантәаҩы Шьалуа Папуашвилии, аполитикатә ашьаҭала аӡбарақәа здызкыло аӡбаҩцәеи, адезинформациа алазырҵәо АИХқәеи. Аҿыц алхрақәа мҩаҧгазароуп», — иануп Европарламент апресс-релизаҿ.