Европарламент  Михаил Саакашвили игәабзиара аҭагылазаашьа иазку арезолиуциа апроект иадгылеит.

Арезолиуциа иақәшаҳаҭхеит  577ҩык адепутатцәа, иақәшаҳаҭымхеит — 33ҩык, рҽааныркылеит  26ҩык.

Иара убас, иацы ицәыргаз аконсолидациатә проект иацлеит Биӡина Иванишвили изку азгәаҭара, ари аинициатива  «Европа Жәлар рпартиа» иатәуп.

Ирыдыркылаз азгәаҭараҿы иануп:«Европарламент иаҵшьны иазгәанаҭоит аолигарх Биӡина Иванишвили, хаҭалатәи ашьоура ҳасабала,  Михаил Саакашвили иҭакра аус аҿы инаигӡаз ароль хада.  Европарламент Европа Ахеилаки адемократиатә партниорцәеи рахь ааҧхьара ҟанаҵоит  Қырҭтәыла аполитикатә прогресс аицәахараҿы инаигӡаз ароль ду азыҳәан, Иванишвили хазхаҭалатәи асанкциақәа изышьақәыргылара алшара иахәаҧшырц».

Европарламент даҽазнык Қырҭтәыла анапхгара рахь ааҧхьара ҟанаҵоит Михаил Саакашвили доужьҭны, аҳәаанырцә аҽыхәшәтәра азин ирҭарц.

«Европарламент, европатәи ареформақәа рынагӡараҿы атәыла апрогресс иадҳәаланы Қырҭтәыла ахада уажәааны иҟалҵаз аҳәамҭа иаҧхьагәаҭаны, Қырҭтәыла ахада илыбжьаргоит Аконституциала иланашьоу ашьауҕа ақәхра азин лхы иалылхәарц.

Иара убас, Европарламент Қырҭтәыла аиҳабыра иргәаланаршәоит атәыла ҧасатәи ахада игәабзиаразы аҭак шрыҧхықәу, иахәҭәоу ахәышәтәра изеиқәыршәареи,  ихадаратә зинқәеи иаҳаҭыри ахьчареи шыруалу», — иануп адокумент аҿы.

Иара убас,  Европарламент Европатәи ахеилаки Еврокомиссиеи рахь ааҧхьара ҟанаҵеит ҧасатәи ахада Михаил Саакашвили ихақәиҭтәра азҵаара иаҳа активла рхы аладырхәырц.

«Европарламент иаҵшьны иазгәанаҭоит ҧасатәи ахада Михаил Саакашвили иус аҿы алҵшәак ҟамлар,  ҳаҧхьаҟа уи  Қырҭтәыла арепутациа ишаҧырхагахо, ари атәыла Евроеидгыла алаларазы акандидат астатус аиура шацәыуадаҩхо;

Европарламент иаҵшьны иазгәанаҭоит Михаил Саакашвили иус лабҿаба ишаанарҧшыз атәылаҿы аӡбаратә система шьаҭанкылатәи ареформа шымҩаҧгатәу» — иануп Европарламент арезолиуциаҿы.

Арезолиуциаҿы ишазгәаҭоу ала, Европарламент, Адәныҟатәи аимадарақәа рзы европатәи амаҵзуреи Акомиссиеи рахь ааҧхьара ҟанаҵоит Михаил Саакашвили идҳәалоу аӡбаратә процессқәа зегьы еиҧҟьарада рмониторинг нарыгӡарц;

Европарламент алахәылацәа Европарламент ахантәаҩы иахь ааҧхьара ҟарҵоит абри арезолиуциа Еврокомиссиа авице-ахадеи, адәныҟатәи аусқәеи ашәарҭадара аполитикеи рзы иреиҳаӡоу акомиссари, Ахеилак алахәылацәеи,  Евроеидгыла иалоу атәылақәа реиҳабырақәеи рпарламентқәеи, Европа ахеилаки, Қырҭтәыла ахадеи, аиҳабыреи, апарламенти ирзыршьҭырц.