Қырҭтәыла ҧасатәи ахада Саломе Зурабишвили лхаҭарнак Ека Беселиа, аҳаирбаҕәазаҿ иҟалаз аинцидент иадҳәаланы, апрокуратура ашшыҧхьыӡ алалҵеит.

Беселиа ишылҳәаз ала, Саломе Зурабишвили ааха лоуит, ҧасатәи ахада амедицинатә гәаҭара дахысын, ааха афакт аофициалла ишьақәырҕәҕәоуп.

Ека Беселиа лгәаанагарала, Саломе Зурабишвили лықәлара заанаҵы еиҿкаан.

«Авидеонҵамҭа хәҭак ҟаиҵеит ахада илыцыз  ауаҩы. Анҵамҭаҿ ҩыџьа ибзиаӡаны иубарҭоуп, аха, ақәлаҩцәа иаҳа ирацәазар ҟалап.  Аинцидент аан уаҟа аполициа иҟамызт, убри аҟынтә, ари ақәлара заанаҵы еиҿкаан ҳәа ҳгәы иаанагоит. Саломе Зурабишвили илзыҧшыз лыхьчара аусзуҩцәа аполициахь аҭел иасит, аха, аӡәгьы дмааит. Атәыла ахада ҧшьҩык лыцын, урҭ рҿахәы рымхтәуп», — илҳәеит  Беселиа.

Миунхентәи Ашәарҭадара аконференциантә ихынҳәуаз Қырҭтәыла ҧасатәи ахада Саломе Зурабишвили аҳаирбаҕәазаҿ илықәлеит. Џьоукы илацәҳауа, акәтаҕьқәа лгәыдырҵеит. Аинцидент авидеонҵамҭа асоциалтә аҳаҿы аларҵәара аиуит.