Павел Герчински ииашам аинформациа алаирҵәоит Қырҭтәыла ҧшьышықәса рыла евроинтеграциа апроцесс ааннакылазшәа, – иануп  „Ақырҭуа гәахәтәы“ акоммуникациақәа рзы адепартамент Феисбуқ даҟьаҿы.

Аҳәамҭа ишану ала, атәыла анапхгара иаҵшьны иазгәарҭеит Ассоциациа иазку аиқәшаҳаҭра шынарыгӡо.

„Қырҭтәыла иҟоу Евроеидгыла ацҳаражәҳәаҩ Павел Герчински ииашам аинформациа алаирҵәоит Қырҭтәыла ҧшьышықәса рыла евроинтеграциа апроцесс ааннакылазшәа. Атәыла анапхгара иаҵшьны иазгәарҭеит Ассоциациа иазку аиқәшаҳаҭра анагӡара шацырҵо, 2028 шықәса анҵәамҭанӡа  ари аиқәшаҳаҭра  90% инагӡазаауеит“, – иануп аҳәамҭаҿы.

Евроеидгыла ацҳаражәҳәаҩ Павел Герчински иацы Қырҭтәыла аҧыза-министр Иракли Кобахиӡе иҳәеит:  „2028 шықәса анҵәамҭанӡа Евроеидгылаҟны аиҿцәажәарақәа раартра азҵаара иқәҳаргылом, Евроеидгыла агрант мап ацәаҳкуеит, аха, ҵыхәҧҵәарада ашантаж ҳзура аӡәгьы азин иаҳҭом“. Абри аҳәамҭа данахцәажәоз Герчински иҳәеит: „Қырҭтәыла анеҩстәи ҧшьышықәса рыҩныҵҟа Евроеидгыла алалара аҽазкра ааннакылоит, аиашаз, уи даараӡа сгәы иалсит“.