«Ауаҩытәыҩса изинқәа рзы европатәи аӡбарҭа ишьақәнарҕәҕәеит Давиҭ Кезерашвили ихьанҭаӡоу ацәгьаура шыҟаиҵаз, дара Қырҭтәыла Иреиҳаӡоу аӡбарҭа иаднакылаз ақәҵара аиашара иазхарҵеит», — иҳәеит Қырҭтәыла аиустициа аминистр  Анри Оханашвили аминистрраҿы имҩаҧигаз абрифинг аҿы.

Анри Оханашвили иҳәамҭала, Европатәи аӡбарҭа ақәҵара инақәыршәаны, Давиҭ Кезерашвили, атәылахьчара аминистрс даныҟаз, аҳәынҭқарратә биуџьет аҿы ақырҭуа ар рзы иазҧхьагәаҭаз аҧара   атәитәит, иара изы аполитикатә ашьҭазаара мҩаҧгамызт.

«Ҳуааҧсыра идҳардырыр ҳҭахуп Кезерашвили иус иадҳәаланы Европатәи аӡбара иаднакылаз ақәҵара.  Европатәи аӡбарҭа ақәҵара инақәыршәаны, Давиҭ Кезерашвили, атәылахьчара аминистрс даныҟаз, 2008 шықәсатәи аибашьранӡа,  аҳәынҭқарратә биуџьет аҿы ақырҭуа ар рзы иазҧхьагәаҭаз аҧара   атәитәит, иара изы аполитикатә ашьҭазаара мҩаҧгамызт.  Араҟа 5 миллион  60 нызқь евро ауп ҳазлацәажәо, иахьатәи акурс ала уи 15 миллион лари ауп.

Европатәи аӡбарҭа ишьақәнаргылеит Кезерашвили изы аполитикатә ашьҭазаара шымҩаҧгамыз. Иара убас, Страсбургтәи аӡбарҭа иазханаҵеит Қырҭтәыла Иреиҳаӡоу аӡбарҭа ақәҵара шиашаз.

Ажәлар иргәалаҳаршәар ҳҭахуп Кезерашвили ихы иаирхәаз ацәгьауратә схема. Иара атәылахьчара аминистрс даныҟаз, 2008 шықәсатәи аибашьранӡа, азакәан еилаганы, афшораҿ ашәҟәы иҭагалоу аилахәырак аҟны ҽнакала аилаӡара ҧаршеи идикылеит, уи инақәыршәаны, ақырҭуа ар рзы арратә азыҟаҵарақәа мҩаҧгазар акәын.  Насгьы, Арбџьармчқәа рштаб хадаҿы ари аилаӡара иазкны акгьы рыздырӡомызт. Ишеилкаахаз ала, ақырҭуа ар рзы изакәызаалак азыҟаҵарақәа мҩаҧгамызт, ар рзы иазҧхьагәаҭаз  5 миллион  60 нызқь евро хықәкыда иныхын.

Ақырҭуа ар ахарџьла ибеиахаз Кезерашвили, аморалтә зарал  азы акомпенсациа аҳасабала, аҳәынҭқарра аҟынтә даҽа  15 нызқь евро даҳәеит, аха, Европатәи аӡбарҭа ари аҳәара иақәшаҳаҭымхеит.

Инеизакны иаҳҳәозар, Страсбург ишьақәнарҕәҕәеит  Кезерашвили ихьанҭаӡоу ацәгьаура шыҟаиҵаз, дара Қырҭтәыла Иреиҳаӡоу аӡбарҭа иаднакылаз ақәҵара аиашара иазхарҵеит.

Ҳҳәынҭқарреи, ақырҭуа арбџьармчқәеи, ҳуаажәлари европатәи аӡбарҭаҿ абри аиааира ду рыдысныҳәалоит», — иҳәеит  Анри Оханашвили.