Қырҭтәыла ахыхьчаратә мчқәа рырҕәҕәара иазку Америка адгыларатә программа аҳәаақәа ирҭагӡаны, аофициалтә визитла Қарҭ даҭааит Европеи Африкеи  иҟоу Америкатә ар рҧыза, аинрал Кавол.

Атәылахьчара аминистрра адыррақәа рыла, хәажәкыра 15-17 рзы аинрал Кавол дидикылеит Қырҭтәыла атәылахьчара аминистр Джуаншер Бурҷулаӡе.  Аиҧылараҿы аганқәа рхаҭарнакцәа ашәарҭадара аусхкы аҿы аусеицура анагӡаразы еиқәшаҳаҭхеит.

Авизит аҳәаақәа ирҭагӡаны, аинрал Каволи аминистр Бурҷулаӡеи ашәарҭадара аганахьала арегион аҿы иҟоу апроблемақәеи,  ашәарҭаадара аусхкы аҿы аусеицура аперспективақәеи ирылацәажәеит. Хшыҩзышьҭра ҷыда рызун азеиҧш арратә азыҟаҵарақәа, урҭ рыгәҭа,  2021 шықәса аҧхынразы имҩаҧысраны иҟоу амилаҭрацәатә арратә азыҟаҵарақәагьы.