Аиуристтә зҵаарақәа ркомитет “Атәым нырра аартызаара иазку” азакәан иақәыз вето иаиааит.

Қырҭтәыла ахада Саломе Зурабишвили “Атәым нырра аартызаара иазку” азакәан вето ақәылҵеит лаҵара 18 рзы.

Саломе Зурабишвили лвето апарламент апленартә еилатәараҿ иахәаԥшуеит.

Лаҵара 14 рзы Апарламент ахԥатәи аԥхьарала “Атәым нырра аартызаара иазку” азакәанпроект аднакылеит. Азакәанпроект иадгылеит 84-ҩык апарламентарцәа, иаҿагылеит 30-ҩык.

Азакәанпроект ала иазыԥхьагәаҭоуп “аартызаара ахьчаразы” атәым мчқәа ринтересқәа назыгӡо, аҳәаанырцә аҟынтә ахатә биуџьет 20% ахашәала змоу аиҿкаарақәеи аихқәеи рҭаҩра. Арҭ аиҿкаарақәа есышықәса афинанстә декларациа ахарҭәаара ирықәшәоит.

“Атәым нырра аартызаара иазку” азакәанпроект ала,ари азҵаара ахылаԥшреи амониторинги мҩаԥнагоит Аиустициа аминистрра.

Аҭаҩра мап ацәкразы аиҿкара 25 нызқь лари ашәахтә ақәҵахоит.