Афинанстә-абиуџьеттә комитет алахәылацәа  “Қырҭтәыла ашәахтә азакәанеидкыла аҧсахрақәа алагалара иазку” азакәан иадҳәаланы атәыла ахада иҟалҵаз иҵаҵгәырку азгәаҭарақәа ирыхәаҧшын, мап рцәыркит.

Қырҭтәыла ахада лпарламенттә маӡаныҟәгаҩ  Гьаргь  Мсхилаӡе ишиҳәаз ала, атәыла ахада афшортәи аилахәырақәа азинҷыдақәа рзышьақәыргылара дақәшаҳаҭым. Азакәан инақәыршәаны, афшорқәа рҿы ашәҟәы иҭагалоу аилахәырақәеи афизикатә хаҿқәеи активқәа рҟынтә ироуа ахашәала Қырҭтәыла аҩныҵҟа аилахәырақәа  ироуа ахашәала еиҧшхоит.

Азинҷыдатә режим амч амазаауеит  2028 шықәса ажьырныҳәа 1-нӡа, афшортәи активқәа зауз ақырҭуа аилахәырақәа  2030 шықәсанӡа амал азы ашәахтә ашәара рықәшәом.

«Иахәҭоу аекономикатәи аполитикатәи анализ ҟамҵакәа апарламентаҿ ирласӡаны ирыдыркылаз абарҭ аҧсахрақәа  ииашам, урҭ рыдкылара ҟалом», — иҳәеит Гьаргь  Мсхилаӡе.