Ҭырқәтәыла адәныҟатәи аусқәа рминистр Хакан Фидан Қырҭтәыла адиныҳәалеит Евроеидгыла алаларазы акандидат астатус аиура. Иара ишиҳәаз ала, аҭырқәа аган Қырҭтәыла иадгылоит евроатлантикатә политикатә структурақәеи ашәарҭадара аструктурақәеи рахь аинтеграциа апроцесс аҿы.

Хакан Фидан ари аҳәамҭа ҟаиҵеит Бақәа имҩаҧгаз Азербаиџьани, Қырҭтәылеи, Ҭырқәтәылеи рдәныҟатәи аусқәа рминистрцәа реиҧылара ашьҭахь. Ари атәы аарыцҳаит аҭырқәа АИХқәа.

Хакан Фидан иаҵшьны иазгәеиҭеит Қырҭтәыла ахьыҧшымреи аҵакырадгьылтә акзаареи  хымҧада пату шақәҵатәу.

Иара иажәақәа рыла, аҭырқәа аган  даҽазнык аарыцҳаит  Аҧсни Аахыҵ Уаҧстәылеи иҟоу аимакқәа аҭынчмҩала рҭыҧқәҵара иазку Қырҭтәыла аиҳабыра рҽазышәара ишадгыло.

Аҭырқәа дипломат иҳәамҭала, аиҧылараҿы иалацәажәеит арегионаҿ аҭагылазаашьеи аусеицура арҭбааразы иҟоу алшарақәеи. Иара иажәақәа рыла, аганқәа аенергетикеи акоммуникациеи аусхкқәа рҿы х-ганктәи аусеицура арҭбааразы еиқәшаҳаҭхеит.