Апартии «Аҕмашенебели истратегиа» ахаҭарнак Ҭако Чиарқвиани лгәаанагара,  Европатәи Ахеилак ахада Шарль Мишель апартиақәа ирыдигалаз адокумент атәылаҿы аҭагылазаашьа аҧсахра иацхраауам. Лара ишылҳәаз ала, Гьаргь Вашаӡе адокумент инапы аҵаиҩыр, лара апартиа далҵуеит.

Гьаргьы Вашаӡе ишааицҳаз ала,  амедиаторцәа ирыдаргалаз адокумент инапы аҵаиҩуеит.

Иацы  Европатәи Ахеилак ахада Шарль Мишель идокумент ҿыц аладырҵәеит. Қырҭтәыла аполитикатә кризис аҭыҧқәҵара иазку адокумент аҿы ишазгәаҭоу ала,  сынтәа ҭагалан имҩаҧысуа ахаланапхгаратә органқәа рахь алхрақәа рҿы «Ақырҭуа гәахәтәы»  апропорциатә системала  43 наӡына рмоур, атәылаҿы изаамҭаным апарламенттә алхрақәа мҩаҧгахоит.

Иара убас, Шарль Мишель идокумент инақәыршәаны, адокумент анапаҵаҩра ашьҭахь мчыбжьык аҩнуҵҟала аганқәа ҩ-уск ирыхәаҧшроуп.