Ҭырқәтәыла Адәныҟатәи аусқәа рминистр – Қырҭтәыла аҭыԥ ҷыда аанызкыло ҳгәыла, астратеиатә ҳпартниор тәылоуп, – Ҭырқәтәыла Адәныҟатәи аусқәа рминистр Ҳақан Фидан Қырҭтәыла Адәныҟатәи аусқәа рминистр Илиа Дарчиашвили иҟны аиԥылара ашьҭахь.

“Ҳара аусеицура ӷәӷәа ҳабжьоу аенергетикеи атранспорти рхырхарҭала. Ҳаизыҟазаашьақәа иҳараку аҩаӡараҿ ишыҟоу иаҵшьны иазгәасҭар сҭахуп. Ҩтәылак рыбжьара аполитикатәи, аекономикатәи, акультуратәи еизыҟазаашьақәа, ҳажәларқәа реизыҟазаашьақәа иҳараку аҩаӡараҿ иҟоуп.

Ақырҭуа сколлега иҟны аиԥылараҿ ҳтәылақәа ирыбжьоу аекономикатәи ахәаахәҭратәи еизыҟазаашьақәа рҿы иҟоу апозитивтә динамика ҳахцәажәеит. Аҵыхәтәантәи 15 шықәса ирылагӡаны, Ҭырқәтәылатәи Ареспублика Қырҭтәылаз зегь реиҳа идуӡӡоу ахәаахәҭратә партниоруп. Ҵыԥх атауареикәшара хмиллиард доллар иаҟаран.

Иахьазы хықәкыс иҳамоуп атауареикәшра хәмиллиард доллар рҟынӡа ашьҭыҵра. Иахьа арҭ азҵаарақәа ҳрыхцәажәеит”,  -иҳәеит Ҳақан Фидан.

Аиԥылараҿ ҭырқәтәыла актәи адипломат ишазгәеиҭаз ала, Ҭырқәтәыла Қырҭтәыла асуверенитети атерриториатә акзаареи рыдгылоит.

Қырҭтәыла Адәныҟатәи аусқәа рминистр Илиа Дарчиашвили визитла Ҭырқәтәыла дыҟоуп. Авизит аҳәаақәа ирҭагӡаны, Илиа Дарчиашвили ҩганкалатәи аиԥылара мҩаԥигеит аҭырқәа иколлега, Ҳақан Фидан иҟны.